സംസ്ഥാനത്ത് മഴ വീണ്ടും ശക്തമായതിനെ തുടര്‍ന്ന് കണ്ണൂര്‍,കോഴിക്കോട്,മലപ്പുറം ജില്ലകളില്‍ ഇന്ന് റെഡ് അലര്‍ട്ട്.വരുന്ന 48 മണിക്കൂര്‍ കൂടി സംസ്ഥാനത്ത് കാലവര്‍ഷം സജീവമായിരിക്കുമെന്ന് കാലാവസ്ഥാ കേന്ദ്രം അറിയിച്ചു. ആലപ്പുഴ, കോട്ടയം, എറണാകുളം, തൃശൂര്‍, ഇടുക്കി, പാലക്കാട്, വയനാട്, കാസര്‍കോട് ജില്ലകളില്‍ ഓറഞ്ച് അലര്‍ട്ടുണ്ട്. എറണാകുളം, കോട്ടയം, ആലപ്പുഴ, ഇടുക്കി, പത്തനംതിട്ട ജില്ലകളില്‍ മഴ ശക്തമാണ്. കോഴിക്കോട്ടെ മലയോരത്ത് മഴ ശക്തമാണ്.
ഇന്നലെ രാത്രി പെയ്ത ശക്തമായ മഴയില്‍ മീനച്ചിലാര്‍ കര കവിഞ്ഞതോടെ പാല – ഈരാറ്റുപേട്ട റോഡില്‍ വെളളം കയറി. ഏറ്റുമാനൂര്‍ –പൂഞ്ഞാര്‍ ഹൈവേയില്‍ മൂന്നാനിയില്‍ വെളളംകയറി. വാഴൂര്‍–പുലിയന്നൂര്‍ റോഡിലും വെളളം കയറി. പത്തനംതിട്ടയില്‍ പമ്പ, മണിമല, അച്ചന്‍കോവില്‍ ആറുകളില്‍ ജലനിരപ്പ് ഉയരുന്നതിനാല്‍ അതീവജാഗ്രത പുലര്‍ത്തണമെന്ന് ജില്ലാഭരണകൂടം അറിയിച്ചു.
Discussion about this post