പത്തനംതിട്ട: എല്ലാ മതക്കാര്‍ക്കും പ്രവേശനമുള്ള ശബരിമലയില്‍ മുസ്ലിം വേഷത്തിലെത്തിയ തീര്‍ത്ഥാടകരെ കേരള പോലിസ് തടഞ്ഞു. ശബരിമല ദര്‍ശനത്തിന് കര്‍ണാടകയില്‍ നിന്നെത്തിയ നാലംഗ സംഘത്തെയാണ് കേരള പോലീസ് തടഞ്ഞുവെച്ചത്. സംസ്ഥാന സ്‌പെഷ്യല്‍ ബ്രാഞ്ചിന്റെ നേതൃത്വത്തില്‍ നടപ്പന്തലില്‍ വച്ചാണ് ഇവരെ തഠഞ്ഞത്. കേന്ദ്ര ഇന്റലിജന്റ്‌സ് ബ്യൂറോ ഉദ്യോഗസ്ഥരും സംഘത്തിലുണ്ടായിരുന്നു.
തടഞ്ഞതിന് പിന്നാലെ മുസ്‌ലിങ്ങളായ അയ്യപ്പഭക്തര്‍ ദര്‍ശനം നടത്താതെ മടങ്ങി.ശബരിമല വലിയ നടപ്പന്തലില്‍ വെള്ളിയാഴ്ച പുലര്‍ച്ചെ ഒന്നരയോടെയായിരുന്നു സംഭവം. ചിക്‌ബെല്ലാപ്പൂര്‍ ജില്ലയിലെ ചിന്താമണി സ്വദേശികളായ ഭാര്‍ഗവേന്ദ്ര, പ്രേംകുമാര്‍, ടി.വി.വിനോദ്, ബാബു റെഡ്ഡി, അന്‍സാര്‍ഖാന്‍, നയാജ്ബാഷ എന്നിവരടങ്ങിയ സംഘത്തെയാണ് പോലിസ് അപമാനിച്ചത്. ഇതില്‍ അന്‍സാര്‍ഖാന്‍, നയാജ്ബാഷ എന്നിവര്‍ മുസ്ലിം വേഷത്തിലായിരുന്നു. ഇവര്‍ വലിയനടപ്പന്തലിലെത്തിയതോടെ പോലീസ് ഉദ്യോഗസ്ഥര്‍ തടഞ്ഞ് വിവരങ്ങള്‍ തിരക്കി. മുസ്ലിം വേഷത്തിലുള്ളവര്‍ തങ്ങളുടെ സുഹൃത്തുക്കളാണെന്നും വിശ്വാസമുള്ളതുകൊണ്ടാണ് വന്നതെന്നും ഒപ്പമുണ്ടായിരുന്നവര്‍ പറഞ്ഞെങ്കിലും സംഘത്തിന്റെ ദര്‍ശനം പോലീസ് തടഞ്ഞു. ഇവരെ പമ്പ പോലീസ് സ്റ്റേഷനിലേക്ക് കൊണ്ടുപോയി.
പമ്പയിലുണ്ടായിരുന്ന കര്‍ണാടക പോലീസിന്റെ സാന്നിധ്യത്തില്‍ ഇവരെ വിശദമായി ചോദ്യംചെയ്തു. സംശയകരമായി ഒന്നും കണ്ടെത്താനായില്ല. അന്‍സാര്‍ഖാനും നയാജ്ബാഷയും പഴത്തിന്റെ മൊത്തക്കച്ചവടക്കാരാണ്. ജില്ലാ പോലീസ് മേധാവി ഉള്‍പ്പെടെ പ്രശ്‌നത്തില്‍ ഇടപെട്ടു. ഉന്നത ഉദ്യോഗസ്ഥരുടെ ഇടപെടലോടെ സംഘത്തിന് ദര്‍ശനത്തിനുള്ള സൗകര്യമൊരുക്കാന്‍ നിര്‍ദേശമുണ്ടായി. എന്നാല്‍, വിഷമമുണ്ടായതിനാല്‍ സന്നിധാനത്തേക്ക് പോകുന്നില്ലെന്ന നിലപാടില്‍ അന്‍സാര്‍ഖാനും നയാജ്ബാഷയും പമ്പയില്‍ത്തന്നെ തങ്ങി. മറ്റുള്ളവര്‍ ദര്‍ശനം നടത്തി. സംഭവം വിവാദമായതോടെ പോലീസ് ബന്ധപ്പെട്ടവരോട് വിശദീകരണം േതടിയതായാണ് വിവരം. ശബരിമലയില്‍ മുസ്ലിങ്ങള്‍ക്ക് ദര്‍ശനം നടത്താമെന്ന് അറിയില്ലെന്നായിരുന്നു കേന്ദ്രപോലീസിന്റെ നിലപാട്. എന്നാല്‍ ചോദ്യം ചെയ്യലിന് നേതൃത്വം നല്‍കിയ കേരളാ പോലിസിന് ഇത് അറിയാമായിരുന്നില്ലേ എന്നാണ് ഭക്തരുടെ ചോദ്യം.
Discussion about this post