കൊല്ലം: കൊല്ലം ചന്ദനത്തോപ്പിൽ പൗരത്വ നിയമ ഭേദഗതിയെ അനുകൂലിച്ച് ബിജെപി നടത്തിയ ജനജാഗരണ യാത്രക്ക് നേരെ അക്രമം നടത്തിയ നാല് എസ് ഡി പി ഐ പ്രവർത്തകരെ പൊലീസ് അറസ്റ്റ് ചെയ്തു. കണ്ടാലറിയാവുന്ന അമ്പത് പേർക്കെതിരെ പൊലീസ് കേസ് എടുത്തിട്ടുണ്ട്. കൂടുതൽ പേർ അറസ്റ്റിലാകാൻ സാദ്ധ്യത.
വെള്ളിയാഴ്ചയായിരുന്നു കൊല്ലം ചന്ദനത്തോപ്പിൽ ബിജെപി നടത്തിയ ജനജാഗരണ യാത്രക്ക് നേരെ ആക്രമണം നടന്നത്. കല്ലേറില് പൊലീസുകാർ ഉള്പ്പടെ എട്ട് പേർക്ക് പരിക്കേറ്റിരുന്നു. സംഘർഷത്തിന്റെ വീഡിയോ ദൃശ്യങ്ങള് പരിശോധിച്ച് കൂടുതല് പേരെ അറസ്റ്റ് ചെയ്യാനാണ് പൊലീസ് നീക്കം.സംഭവവുമായി ബന്ധമുള്ള ചിലർ ഒളിവില് പോയതായി പൊലീസ് അറിയിച്ചു. അക്രമികൾക്കെതിരെ ശക്തമായ നടപടി വേണമെന്ന് ബിജെപി ആവശ്യപ്പെട്ടിരുന്നു.
സംഭവസ്ഥലത്ത് സംഘർഷ സാദ്ധ്യത കണക്കിലെടുത്ത് പൊലീസ് ക്യാമ്പ് ചെയ്യുന്നുണ്ട്.
