തിരുവനന്തപുരം: കർണ്ണാടകയിൽ കുടുങ്ങിക്കിടക്കുന്ന മലയാളികളെ നാട്ടിലെത്തിക്കാൻ ബസ്സുകൾ അനുവദിക്കണമെന്ന് ആവശ്യപ്പെട്ട് ബിജെപി സംസ്ഥാന അധ്യക്ഷൻ കെ സുരേന്ദ്രൻ കർണ്ണാടക മുഖ്യമന്ത്രി യെദ്യൂരപ്പയ്ക്ക് കത്തയച്ചു.
മലയാളികളെ കേരളത്തിലെത്തിക്കുന്നതിന് കർണ്ണാടകയിൽ നിന്നുള്ള പ്രത്യേക ബസ്സുകൾ ഏർപ്പെടുത്തണമെന്നാണ് കെ സുരേന്ദ്രൻ യെദ്യൂരപ്പയ്ക്ക് അയച്ച കത്തിൽ ആവശ്യപ്പെട്ടത്. വിഷയത്തിൽ സാദ്ധ്യമായതെല്ലം ചെയ്യുമെന്ന് കർണ്ണാടക മുഖ്യമന്ത്രി ബി എസ് യെദ്യൂരപ്പ കെ സുരേന്ദ്രനെ അറിയിച്ചു. ബസ്സുകളിൽ മലയാളികളെ നാട്ടിലെത്തിക്കാനുള്ള സാധ്യത ഉൾപ്പടെ എല്ലാം പരിശോധിച്ച് ഉടൻ നടപടി ഉണ്ടാകുമെന്ന് യെദ്യൂരപ്പ ഉറപ്പു നൽകിയതായി കെ. സുരേന്ദ്രൻ പറഞ്ഞു.
ലോക്ക് ഡൗണിനെ തുടർന്ന് കർണ്ണാടകയിൽ അകപ്പെട്ട ഗർഭിണികളും രോഗികളും വിദ്യാർത്ഥികളും അടങ്ങുന്നവരെ സഹായിക്കാൻ കേരള സർക്കാരിന്റെ ഭാഗത്ത് നിന്നും യാതൊരു നടപടിയും ഉണ്ടാകാത്ത സാഹചര്യത്തിലാണ് കെ സുരേന്ദ്രൻ കർണ്ണാടക മുഖ്യമന്ത്രിയുമായി ബന്ധപ്പെട്ടത്. തുടർന്ന് വിശദ വിവരങ്ങൾ ഉൾപ്പെടുത്തി അദ്ദേഹം യെദ്യൂരപ്പക്ക് കത്തയക്കുകയായിരുന്നു.
കർണ്ണാടക ഉൾപ്പെടെയുള്ള സംസ്ഥാനങ്ങളിൽ നിന്ന് കേരളത്തിലേക്ക് പുറപ്പെട്ട മലയാളികൾ നിലവിൽ സംസ്ഥാനത്തേക്ക് പ്രവേശനം നിഷേധിക്കപ്പെട്ട് അതിർത്തികളിൽ ദുരിതമനുഭവിക്കുകയാണ്. ഇവർക്ക് സംസ്ഥാനത്തേക്ക് പ്രവേശനാനുമതി നൽകി കെ എസ് ആർ ടി സി അടക്കമുള്ള സംവിധാനങ്ങളിൽ നാട്ടിലെത്തിക്കണമെന്ന ആവശ്യം ശക്തമാണെങ്കിലും വിഷയത്തിൽ കേരള സർക്കാരിന്റെ അനങ്ങാപ്പാറ നയം തുടരുകയാണ്.
Discussion about this post