ഷാര്ജ: ഷാര്ജയിലെ ടൂറിസം വികസനത്തിന് പുതിയ മുഖം നല്കിക്കൊണ്ട് ‘വാട്ടര് ഫ്രണ്ട് സിറ്റി ‘ പദ്ധതിക്ക് രൂപം നല്കുന്നു.
36 കിലോമീറ്ററോളം വരുന്ന ഷാര്ജയുടെ തീരപ്രദേശങ്ങള് കേന്ദ്രീകരിച്ചാണ് ഈ വന് പദ്ധതി വരുന്നത്. 9.35 ബില്യന് ദിര്ഹം ചെലവ് കണക്കാക്കിയ ഈ പദ്ധതി പൂര്ത്തിയായാല് 2021 ആകുമ്പോഴേക്കും പത്തുദശലക്ഷം സന്ദര്ശകര് എത്തിച്ചേരുമെന്നാണ് കണക്കുകൂട്ടുന്നത്. ഷാര്ജയുടെ പുതിയ ‘ടൂറിസം വിഷന്’ പദ്ധതിയുടെ ഭാഗമായാണ് വാട്ടര് ഫ്രണ്ട് സിറ്റി നിര്മിക്കുന്നത്. യു.എ.ഇ.യുടെ അമ്പതാമത് ദേശീയദിനത്തിനുള്ള ഷാര്ജയുടെ സമ്മാനമായാണ് ഈ പദ്ധതിയെ കണക്കാക്കുന്നത്.
നിലവില് ഷാര്ജ അല് മജാസ് വാട്ടര്ഫ്രണ്ട് പ്രദേശമാണ് സമാനരീതിയില് വിനോദസഞ്ചാരികള് പ്രധാനമായും ഉപയോഗിക്കുന്നത്. കുടുംബങ്ങള്ക്ക് സമയം ചെലവഴിക്കാനും കുട്ടികള്ക്കും രക്ഷിതാക്കള്ക്കും ഒരേപോലെ ആസ്വദിക്കാനും സാധിക്കും വിധത്തിലാണ് പുതിയ വാട്ടര്ഫ്രണ്ട് സിറ്റി രൂപകല്പന ചെയ്തിരിക്കുന്നത്. കുട്ടികളെ രക്ഷിതാക്കള്ക്ക് കൂടുതല് ശ്രദ്ധിക്കാനായി ശിശു സംരക്ഷണശാല, ഹെയര് സലൂണ്, കലയും കരകൗശല വസ്തുക്കളും പ്രദര്ശിപ്പിക്കാനുള്ള പ്രത്യേക ഇടം, വിവിധ വിനോദ പരിപാടികള് ആസ്വദിക്കാനുള്ള ഇടം തുടങ്ങിയവയെല്ലാം പുതിയ വാട്ടര് ഫ്രണ്ട് സിറ്റിയില് ഉണ്ടാകും.
ഇതിന്റെ നിര്മാണ പ്രവര്ത്തനങ്ങള് ഉടന് തന്നെ ആരംഭിക്കാനുള്ള പദ്ധതി തയ്യാറായിക്കഴിഞ്ഞു. പ്രകൃതിയുടേതെന്ന് തോന്നിപ്പിക്കും വിധത്തില് കനാലുകള്, പത്തോളം ദ്വീപ് പ്രദേശങ്ങള്, വില്ല, അപ്പാര്ട്ട്മെന്റുകള്, ഓഫീസുകള്, ഹോട്ടലുകള്, ലിഷര് സിറ്റി, റിക്രിയേഷന് ഏരിയ, മറൈന് ക്ലബ്ബ് തുടങ്ങിയവയെല്ലാം നിര്മാണം നടക്കുന്ന ഷാര്ജ വാട്ടര് ഫ്രണ്ട് സിറ്റിയില് ഉണ്ടാകും. കുട്ടികള്ക്ക് വിവിധ കളികളില് ഏര്പ്പെടാനുള്ള സൗകര്യം കൂടാതെ മുതിര്ന്നവര്ക്കുള്ള യോഗസെന്റര് കൂടി ഇവിടെ നിര്മിക്കാനാണ് പദ്ധതി.
Discussion about this post