ഡൽഹി: ഡിജിറ്റൽ രംഗത്ത് സ്വയം പര്യാപ്തത ലക്ഷ്യമിട്ട് ആത്മനിർഭർ ചലഞ്ചിന് തുടക്കമിട്ട് പ്രധാനമന്ത്രി നരേന്ദ്ര മോദി. കമ്പ്യൂട്ടർ- മൊബൈൽ ആപ്ലിക്കേഷനുകളുടെ നിർമ്മാണത്തിൽ രാജ്യം സ്വയം പര്യാപ്തത കൈവരിക്കണമെന്നും അതിനുതകുന്ന ഒരു അന്തരീക്ഷം സൃഷ്ടിക്കപ്പെടേണ്ടതുണ്ടെന്നും സാങ്കേതിക- സ്റ്റാർട്ടപ്പ് സമൂഹത്തോട് അദ്ദേഹം ആവശ്യപ്പെട്ടു.
നമ്മുടെ സ്റ്റാർട്ടപ്പ്- സാങ്കേതിക മേഖലയ്ക്ക് മികച്ച അവസരമാണ് കൈവന്നിരിക്കുന്നതെന്നും സ്വദേശി ആപ്പുകളുടെ വികാസവും പുരോഗതിയും സാദ്ധ്യമാകേണ്ടതുണ്ടെന്നും അദ്ദേഹം അഭിപ്രായപ്പെട്ടു. സാങ്കേതിക പരിജ്ഞാനത്തിലും കഠിനാധ്വാനത്തിലും ഇന്ത്യ മറ്റാർക്കും പിന്നിലല്ലെന്ന് നമുക്ക് തെളിയിക്കേണ്ടതുണ്ടെന്നും അദ്ദേഹം കൂട്ടിച്ചേർത്തു.
നിലവിലുള്ള ആപ്പുകളുടെ പ്രചാരണവും പുതിയ ആപ്പുകളുടെ വികാസവുമാണ് പദ്ധതിയുടെ ലക്ഷ്യങ്ങൾ. ഓൺലൈൻ പഠനം, ഗെയിമുകൾ, ബിസിനസ്സ് ആപ്പുകൾ, വിനോദം, ഓഫീസ് ഉപയോഗം എന്നിവയ്ക്കും പദ്ധതി ഊന്നൽ നൽകുന്നു.
കൊവിഡ് കാലഘട്ടത്തെ അവസരമാക്കി മാറ്റണമെന്ന് ആവർത്തിച്ച പ്രധാനമന്ത്രി, വർക്ക് ഫ്രം ഹോമിന്റെ സാദ്ധ്യതകളെക്കുറിച്ചും സംസാരിച്ചു. പരമ്പരാഗതമായ ഇന്ത്യൻ വിനോദങ്ങളെ ആപ്പുകൾ വഴി പ്രചരിപ്പിക്കാനുള്ള സാദ്ധ്യതയും അദ്ദേഹം ആരാഞ്ഞു.
This challenge is for you if you have such a working product or if you feel you have the vision and expertise to create such products. I urge all my friends in the tech community to participate.
Sharing my thoughts in my @LinkedIn post. https://t.co/aO5cMYi4SH
— Narendra Modi (@narendramodi) July 4, 2020
സ്റ്റാർട്ടപ്പ്- വിവരസാങ്കേതിക മേഖലയിലുള്ള എല്ലാവരും ഈ ചലഞ്ച് ഏറ്റെടുക്കണമെന്നും മികച്ച ആശയങ്ങളും വൈദഗ്ധ്യവും ആദരിക്കപ്പെടുമെന്നും പ്രധാനമന്ത്രി ഉറപ്പ് നൽകി. അതിർത്തിയിൽ സംഘർഷങ്ങൾ നിലനിൽക്കുന്ന സാഹചര്യത്തിൽ 59 ചൈനീസ് ആപ്പുകൾ സുരക്ഷാ കാരണങ്ങൾ മുൻനിർത്തി ഇന്ത്യ നിരോധിച്ചിരുന്നു. ഈ പശ്ചാത്തലത്തിലാണ് പ്രധാനമന്ത്രിയുടെ പുതിയ പ്രഖ്യാപനം.
Discussion about this post