ഇന്ത്യയുമായുള്ള അതിർത്തി തർക്കത്തിൽ അനാവശ്യ ഇടപെടലുകൾ നടത്തേണ്ടതില്ലെന്ന് അമേരിക്കയോട് ചൈന. ഇരുരാജ്യങ്ങൾക്കും തങ്ങളുടെ പ്രശ്നങ്ങൾ പരിഹരിക്കാനറിയാമെന്നും ചൈന പറഞ്ഞു.ഇന്ത്യയുൾപ്പെടെയുള്ള രാജ്യങ്ങൾക്കെതിരെ ചൈന നടത്തുന്ന അതിർത്തി കടന്നുള്ള ആക്രമണത്തെ ശക്തമായി പ്രതിരോധിക്കുമെന്ന് വ്യക്തമാക്കി അമേരിക്കൻ സ്റ്റേറ്റ് ഡെപ്യൂട്ടി സെക്രട്ടറി സ്റ്റീഫൻ ബെയ്ഗൺ തിങ്കളാഴ്ച രംഗത്തു വന്നിരുന്നു.സ്റ്റീഫന്റെ ഈ പ്രസ്താവനയോട് പ്രതികരിക്കുമ്പോഴാണ് തങ്ങൾക്ക് ഇന്ത്യയുമായുള്ള സംഘർഷങ്ങളിൽ അമേരിക്ക അനാവശ്യമായി കൈകടത്തേണ്ടതില്ലെന്ന് ചൈനീസ് എംബസിയുടെ ഔദ്യോഗിക വക്താവായ ജിം റോങ് അറിയിച്ചത്.
അതിർത്തിയിൽ സമാധാനം പുനഃസ്ഥാപിക്കാനുള്ള ചർച്ചകൾ നടന്നുവരികയാണെന്നും ഈ അവസരത്തിൽ ചൈനയെന്ത് ചെയ്യണമെന്ന് തീരുമാനിക്കേണ്ടത് മറ്റു രാജ്യങ്ങളല്ലെന്നും ജിം റോങ് കൂട്ടിച്ചേർത്തു.2020-ൽ ഇന്ത്യയും ചൈനയും തമ്മിൽ നയതന്ത്രപരമായ ബന്ധമാരംഭിച്ചിട്ട് 70 വർഷം തികയുകയാണ്. തുടർന്നും പരസ്പര സഹകരണത്തോടെ മുന്നോട്ട് പോകാൻ ശ്രമിക്കുമെന്നും ജിം വ്യക്തമാക്കി.
