രാജ്യത്തിന്റെ പരമാധികാര സ്ഥാനത്തുനിന്നും ബ്രിട്ടീഷ് രാജ്ഞിയെ നീക്കാനൊരുങ്ങി കരീബിയൻ ദ്വീപ് രാഷ്ട്രമായ ബാർബഡോസ്. 2021 നവംബറോടെ രാജ്യത്തെ റിപ്പബ്ലിക് ആയി പ്രഖ്യാപിക്കാനാണ് ബാർബഡോസ് ഭരണകൂടത്തിന്റെ തീരുമാനം. തങ്ങളുടെ കൊളോണിയൽ ചരിത്രം പൂർണമായി ഒഴിവാക്കാനുള്ള സമയം എത്തിയിരിക്കുന്നുവെന്നും, ബാർബാഡിയക്കാർക്കാവശ്യം ബാർബാഡിയക്കാരനായ രാഷ്ട്രത്തലവനെയാണെന്നും ബാർബഡോസ് ഗവർണർ ജനറൽ ഡേമ് സാന്ദ്ര മസോൺ വ്യക്തമാക്കി.
രാജ്യത്തെ പ്രധാനമന്ത്രി മിയ മോട്ട്ലിയെ പ്രതിനിധീകരിച്ചാണ് ബാർബഡോസ് ഗവർണർ ജനറൽ ഇക്കാര്യം ജനങ്ങളെയറിയിച്ചത്.1966- ൽ ബ്രിട്ടനിൽ നിന്നും രാജ്യം സ്വാതന്ത്ര്യം നേടിയിരുന്നുവെങ്കിലും ബാർബഡോസിന്റെ പരമാധികാരം ബ്രിട്ടനിലെ രാജ്ഞിക്ക് തന്നെയായിരുന്നു. രാജ്യം 55-മത്തെ സ്വാതന്ത്ര്യ ദിനം ആഘോഷിക്കുന്നതിനു മുന്നോടിയായി ബാർബഡോസിനെ റിപ്പബ്ലിക്ക് ആക്കാനുള്ള യുക്തിസഹജമായ നടപടികൾ ഭരണകൂടം കൈക്കൊള്ളുമെന്ന് ഗവർണർ ജനറൽ ഡേമ് സാന്ദ്ര മസോൺ അറിയിച്ചിട്ടുണ്ട്
