ലണ്ടന്‍ : 35 വര്‍ഷത്തിനകം ബ്രിട്ടന്‍ കടലിലിറക്കാന്‍ പോകുന്ന പുതുതലമുറ യുദ്ധക്കപ്പല്‍ മാതൃക പുറത്തിറങ്ങി. റോയല്‍ എയര്‍ഫോഴ്‌സിന്റെ (ആര്‍എഎഫ്) പോര്‍വിമാനങ്ങള്‍ ഇതിനകം ഡ്രോണുകള്‍ക്കു വഴിമാറിയിട്ടുണ്ട്. ദൂരെ കംപ്യൂട്ടര്‍ സ്‌ക്രീനിനു മുന്നിലിരുന്നു വ്യോമസേനാംഗങ്ങളാണു ഡ്രോണുകളെ നിയന്ത്രിക്കുക.
അതേ മാതൃകയില്‍ റോയല്‍ നേവി യുദ്ധക്കപ്പലുകളിലും പുതിയകാല സാങ്കേതികവിദ്യയുടെ സാധ്യതകള്‍ അന്വേഷിച്ചതിന്റെ ഫലമാണു ഡ്രെഡ്‌നോട്ട് 2050 എന്നു പേരിട്ട ഈ യുദ്ധക്കപ്പലുകള്‍. ഇവ വിദൂരനിയന്ത്രിതമായിരിക്കും. അതിവേഗമാര്‍ന്നതും നവീനരീതിയിലുള്ള ആയുധങ്ങള്‍ പ്രയോഗിക്കാന്‍ ശേഷിയുള്ളതുമായിരിക്കും.
അഞ്ചു നാവികര്‍ക്കു ദൂരെ കംപ്യൂട്ടര്‍ സ്‌ക്രീനിനു മുന്നിലിരുന്ന് ഇവ നിയന്ത്രിക്കാം. ആകെ ക്രൂ അംഗങ്ങള്‍ 50 മതിയാകും. നിലവില്‍ ഒരു യുദ്ധക്കപ്പലിന് 200 പേര്‍ വേണം. ബ്രിട്ടിഷ് നാവിക വിദഗ്ധരോടൊപ്പം ഗവേഷണം നടത്തുന്ന പ്രമുഖ ബ്രിട്ടിഷ് ഇലക്ട്രോണിക് സിസ്റ്റംസ് ആണ് പുതിയ യുദ്ധക്കപ്പലുകളുടെ രൂപകല്‍പന പുറത്തുവിട്ടത്.
Discussion about this post