‘മേക്ക് ഇൻ ഇന്ത്യ‘; ചൈനീസ് ഫോണുകളെ പൊളിച്ചടുക്കുന്ന ഫീച്ചറുകളുമായി ഇൻ സീരീസ് സ്മാർട്ട് ഫോണുകൾ അവതരിപ്പിച്ച് മൈക്രോമാക്സ്

ഡൽഹി: ഇന്ത്യൻ സ്മാർട്ട് ഫോൺ വിപണിയിലെ ചൈനീസ് വിളയാട്ടത്തിന് അന്ത്യം കുറിക്കാൻ പുതിയ സ്മാർട്ട് ഫോണുകളുമായി മൈക്രോമാക്സ്. മികച്ച വിലക്കുറവും ഫീച്ചറുകളുമായി ഇന്‍ നോട്ട്1, ഇന്‍ 1ബി എന്നീ ഫോണുകളാണ് മൈക്രോമാക്‌സ് ഇന്‍ഫോമാറ്റിക്‌സ് പുറത്തിറക്കിയിരിക്കുന്നത്.

2 ജിബി + 32 ജിബി/ 4 ജിബി+64 ജിബി എന്നീ ശ്രേണികളില്‍ പര്‍പ്പിള്‍, നീല, പച്ച എന്നീ നിറങ്ങളിലാണ് ഇന്‍ 1ബി അവതരിപ്പിച്ചിരിക്കുന്നത്. നവംബര്‍ 26നാണ് ഇതിന്റെ വിൽപ്പന ഓൺലൈനിലൂടെ ആരംഭിക്കുക. മീഡിയാടെക് ഹീലിയോ ജി35 ഗെയിമിങ് പ്രോസസ്സറും മീഡിയാടെക് ഹൈപ്പര്‍ എഞ്ചിന്‍ ഗെയിമിങ് ടെക്‌നോളജിയും അടങ്ങുന്നതാണ് ഇൻ 1ബി. 13 എംപി എഐ ഡ്യുയല്‍ കാമറയാണ് ഇതിലുള്ളത്.  ഇന്‍ 1ബി 32 ജിബിക്ക് 6,999 രൂപയും 64 ജിബിക്ക് 7,999 രൂപയുമാണ് വില.

4 ജിബി + 64 ജിബി, 4ജിബി + 128ജിബി എന്നീ ശ്രേണികളില്‍ പച്ച, വെള്ള നിറങ്ങളിലുമാണ് ഇന്‍ നോട്ട് 1 വിപണിയിൽ എത്തുന്നത്. നവംബര്‍ 24-ന് ഇന്‍ നോട്ട് 1-ന്റെ ഓൺലൈൻ വിൽപ്പന ആരംഭിക്കും. ഇവയുടെ രജിസ്‌ട്രേഷന്‍ ഫ്‌ളിപ്പ്കാര്‍ട്ട്, micromaxinfo.com എന്നീ സൈറ്റുകളില്‍ ആരംഭിച്ചു കഴിഞ്ഞു. മീഡിയാടെക് ഹീലിയോ ജി85 പ്രോസസ്സറും മീഡിയാടെക് ഹൈപ്പര്‍ എഞ്ചിന്‍ ഗെയിമിങ് ടെക്‌നോളജിയുമാണ് ഇന്‍ നോട്ട് 1ന്റെ സവിശേഷത. 48എംപി എഐ ക്വാഡ് കാമറയും 16എംപി വൈഡ് ആംഗ്ള്‍ സെല്‍ഫി കാമറയും ഇതിനെ ആകർഷണീയമാക്കുന്നു. ഇന്‍ നോട്ട് 1, 64 ജിബിക്ക് 10,999 രൂപയും  128 ജിബിക്ക് 12,499 യുമാണ് വില. ഓൺലൈൻ വിൽപ്പന പുരോഗമിക്കുന്ന മുറക്ക് റീട്ടെയില്‍ ഔട്ട്‌ലെറ്റുകളിലും ഫോണുകള്‍ ലഭ്യമാകുമെന്ന് മൈക്രോമാക്‌സ് അധികൃതര്‍ അറിയിച്ചു.

ഇന്‍ നോട്ട്1, ഇന്‍ 1ബി എന്നീ ഫോണുകൾ വിപണിയിലിറക്കിയതിലൂടെ ഇന്ത്യന്‍ സ്മാര്‍ട്ട്‌ഫോണ്‍ വിപണിയില്‍ പുത്തന്‍ യുഗത്തിന് തുടക്കംകുറിച്ചിരിക്കുകയാണെന്ന് മൈക്രോമാക്‌സ് ഇന്ത്യ സഹസ്ഥാപകന്‍ രാഹുല്‍ ശര്‍മ പറഞ്ഞു. ഉപഭോക്താക്കളുടെ ആവശ്യങ്ങള്‍ക്ക് അനുസൃതമായി ഡിസൈനിലും സാങ്കേതികവിദ്യയിലും ഉയര്‍ന്ന നിലവാരം കൊണ്ടുവരാനുള്ള ശ്രമം തുടരുമെന്നും അദ്ദേഹം അറിയിച്ചു.

ഒരുകാലത്ത് ഇന്ത്യൻ സ്മാർട്ട് ഫോൺ വിപണിയിലെ ഏറ്റവും ജനപ്രിയ ബ്രാൻഡായിരുന്നു മൈക്രോമാക്സ്. കുറഞ്ഞ വിലക്ക് ഗുണമേന്മയുള്ള ഉത്പന്നങ്ങൾ വിപണിയിലിറക്കിയിരുന്ന മൈക്രോമാക്സ്, ചൈനീസ് ഫോണുകളുടെ ആവിർഭാവത്തോടെ നിറം മങ്ങുകയായിരുന്നു. എന്നാൽ പുതിയ ബ്രാൻഡുകളുടെ അവതരണത്തോടെ ദീപാവലി- ക്രിസ്മസ് വിപണികൾ കൈയ്യടക്കി പഴയ പ്രതാപം വീണ്ടെടുക്കാനുള്ള ശ്രമത്തിലാണ് ഈ ഇന്ത്യൻ കമ്പനി.