ലഖ്‌നൗ: കോവിഡ് വാക്‌സിന്‍ സ്വീകരിക്കില്ലെന്ന സമാജ്‌വാദി പാര്‍ട്ടി നേതാവ് അഖിലേഷ് യാദവിന്റെ പരാമര്‍ശത്തിനെതിരെ ബിജെപി. ബിജെപി ദേശീയ ജനറല്‍ സെക്രട്ടറി ബി.എല്‍ സന്തോഷ്, ഉത്തര്‍പ്രദേശ് ഉപമുഖ്യമന്ത്രി കേശവ് പ്രസാദ് മൗര്യ, ബിജെപി വക്താവ് സംപിത് പത്ര, കേന്ദ്ര ധനകാര്യ സഹമന്ത്രി അനുരാഗ് ഠാക്കൂര്‍ എന്നിവരാണ് അഖിലേഷിനെതിരെ രംഗത്തെത്തിയത്.
രാജ്യം ഭരിക്കുന്ന സര്‍ക്കാരിനെ മാത്രമല്ല, വാക്‌സിന്‍ വികസിപ്പിക്കാനായി രാപ്പകല്‍ ഇല്ലാതെ പ്രവര്‍ത്തിച്ച എല്ലാ ശാസ്ത്രജ്ഞരെയും ഡോക്ടര്‍മാരെയുമാണ് അഖിലേഷ് അപമാനിച്ചതെന്ന് ഉത്തര്‍പ്രദേശ് ഉപമുഖ്യമന്ത്രി കേശവ് പ്രസാദ് മൗര്യ പറഞ്ഞു. ഉത്തര്‍പ്രദേശ് മുന്‍ മുഖ്യമന്ത്രിയായ അഖിലേഷ് മാപ്പ് പറയണമെന്നും അദ്ദേഹം ആവശ്യപ്പെട്ടു.
അഖിലേഷ് യാദവ് രാഹുല്‍ ഗാന്ധിയ്ക്ക് പറ്റിയ എതിരാളിയാണെന്ന് അഖിലേഷ് യാദവിന്റെ പരാമര്‍ശത്തെ പരിഹസിച്ച് ബിജെപി വക്താവ് സംപിത് പത്ര പറഞ്ഞു. വാക്‌സിന്‍ സ്വീകരിക്കില്ലെന്ന അഖിലേഷിന്റെ തീരുമാനത്തെ സ്വാഗതം ചെയ്യുന്നുവെന്നും ഇതിലൂടെ ഒരു സാധാരണക്കാരന് അവസരം ലഭിക്കുമെന്നുമാണ് ബി.എല്‍ സന്തോഷ് പ്രതികരിച്ചത്. ഇതുവരെ കേട്ടതില്‍ വെച്ച്‌ ഏറ്റവും വലിയ വിഡ്ഢിത്ത പ്രസ്താവനയാണിതെന്നും അദ്ദേഹം വിമര്‍ശിച്ചു.
എന്നാല്‍ അഖിലേഷ് വളരെ ചെറിയ പ്രായത്തില്‍ മുഖ്യമന്ത്രിയായത് സംസ്ഥാനത്തിന് ദൗര്‍ഭാഗ്യമാണ് സമ്മാനിച്ചത് എന്നാണ് കേന്ദ്ര ധനകാര്യ സഹമന്ത്രി അനുരാഗ് ഠാക്കൂര്‍ പറഞ്ഞത്. ഓരോ പൗരന്റെയും ജീവന്‍ രക്ഷിക്കാനായി ശാസ്ത്രജ്ഞര്‍ കഠിനമായി പ്രവര്‍ത്തിക്കുമ്പോഴാണ് അഖിലേഷ് ഇത്തരത്തിലൊരു പ്രസ്താവന നടത്തിയതെന്നും അദ്ദേഹം കുറ്റപ്പെടുത്തി.
Discussion about this post