അബുദാബി: അന്താരാഷ്ട്ര ക്രിക്കറ്റിൽ സെഞ്ചുറി നേടി മലയാളിയായ റിസ്വാൻ. അയർലൻഡിനെതിരായ ഏകദിന പരമ്പരയിലെ ഒന്നാം മത്സരത്തിൽ യു എ ഇക്ക് വേണ്ടിയാണ് കണ്ണൂർ തലശ്ശേരി ചുണ്ടങ്ങാപ്പൊയിൽ റിസ്വാൻ സെഞ്ചുറി നേടിയത്. റിസ്വാന്റെയും സഹതാരം മുഹമ്മദ് ഉസ്മാന്റെയും സെഞ്ചുറികളുടെ മികവിൽ യുഎഇ അയർലൻഡിനെ ആറ് വിക്കറ്റിന് പരാജയപ്പെടുത്തി.
ടോസ് നേടി ബാറ്റിങ് തിരഞ്ഞെടുത്ത അയർലൻഡ് നിശ്ചിത 50 ഓവറിൽ അഞ്ച് വിക്കറ്റ് നഷ്ടത്തിൽ 269 റൺസെടുത്തു. മറുപടി ബാറ്റിങ്ങിൽ റിസ്വാന്റെയും ഉസ്മാന്റെയും സെഞ്ചുറികൾ 49ആം ഓവറിൽ നാല് വിക്കറ്റ് നഷ്ടത്തിൽ യുഎഇയെ വിജയത്തിലെത്തിച്ചു. 136 പന്തുകളിൽ ഒൻപത് ബൗണ്ടറികളും ഒരു സിക്സും ഉൾപ്പെടെ റിസ്വാൻ 109 റൺസ് നേടി.
ഫസ്റ്റ് ഡൗണായി ഇറങ്ങി യുഎഇയെ വിജയതീരത്ത് എത്തിച്ച റിസ്വാനാണ് മാൻ ഓഫ് ദി മാച്ച്. ഇതോടെ നാല് മത്സരങ്ങളുടെ പരമ്പരയിൽ യുഎഇ 1-0ന് മുന്നിലെത്തി.
Discussion about this post