മുംബൈ: ‘ഉറി: ദ് സർജിക്കൽ സ്ട്രൈക്കിന്റെ‘ രണ്ടാം വാർഷികത്തിൽ പുതിയ ചിത്രത്തിന്റെ ഫസ്റ്റ് ലുക്ക് പോസ്റ്ററുകൾ പുറത്തു വിട്ട് ആരാധകരെ ആവേശഭരിതരാക്കി ബോളിവുഡ് സൂപ്പർ താരം വിക്കി കൗശൽ. ‘അശ്വത്ഥാമാ‘ എന്ന് പേരിട്ടിരിക്കുന്ന ചിത്രം സംവിധാനം ചെയ്യുന്നത് ഉറിയുടെ സംവിധായകൻ ആദിത്യ ഥർ തന്നെയാണ്.
ഇൻസ്റ്റാഗ്രാമിലാണ് ചിത്രത്തിന്റെ പോസ്റ്ററുകൾ താരം പങ്ക് വെച്ചിരിക്കുന്നത്. പുരാണ കഥാപാത്രമായ അശ്വത്ഥാമാവിന്റെ കഥയെ ആസ്പദമാക്കി പുറത്തിറങ്ങുന്ന സയൻസ് ഫിക്ഷൻ ചിത്രമാണ് ‘ദി ഇമ്മോർട്ടൽ അശ്വത്ഥാമാ‘. ഒരു ആധുനിക നഗരത്തിന്റെ പശ്ചാത്തലത്തിൽ മുറിവേറ്റ ഒരു യന്ത്രക്കൈയ്യിൽ അശ്വത്ഥാമാവ് എന്ന കേന്ദ്ര കഥാപാത്രം ആയുധവുമായി നിൽക്കുന്നതാണ് ആദ്യ പോസ്റ്റർ.
ശിവഭഗവാന്റെ ഒരു വലിയ വിഗ്രഹത്തിന് മുന്നിൽ തന്റെ തിളങ്ങുന്ന ആയുധവുമായി അശ്വത്ഥാമാവ് നിൽക്കുന്നതാണ് രണ്ടാമത്തെ പോസ്റ്റർ. ആദിത്യ ഥർ തന്നെയാണ് ചിത്രത്തിന്റെ രചനയും നിർവ്വഹിക്കുന്നത്.
ആദിത്യ ഥറിന്റെ അരങ്ങേറ്റ ചിത്രമായ ‘ഉറി; ദ് സർജിക്കൽ സ്ട്രൈക്ക്‘ 2018ലാണ് റിലീസ് ചെയ്തത്. ബോക്സോഫീസിൽ വമ്പൻ വിജയമായ ചിത്രം മികച്ച നടനും സംവിധായകനുമുൾപ്പെടെ മൂന്ന് ദേശീയ പുരസ്കാരങ്ങൾ നേടിയിരുന്നു.
https://www.instagram.com/p/CJ5Rwr3p1sT/
Discussion about this post