തിരുവനന്തപുരം: സ്വർണ്ണക്കടത്ത് കേസിൽ പ്രതിപക്ഷം നിയമസഭയിൽ അടിയന്തര പ്രമേയത്തിന് നോട്ടീസ് നൽകി. പ്രതിപക്ഷ എം.എൽ.എ പി.ടി. തോമസാണ് അടിയന്തര പ്രമേയത്തിന് നോട്ടീസ് നല്കിയത്. മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി അറസ്റ്റിലായതും അഡീഷണല് പ്രൈവറ്റ് സെക്രട്ടറി ചോദ്യം ചെയ്യലിന് വിധേയനായതും സഭ നിര്ത്തിവെച്ച് ചര്ച്ച ചെയ്യണമെന്ന് പ്രതിപക്ഷം ആവശ്യപ്പെട്ടു.
സ്വർണ്ണക്കടത്ത് കേസുമായി ബന്ധപ്പെട്ട് മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി അറസ്റ്റിലാണ്. അഡീഷണല് പ്രൈവറ്റ് സെക്രട്ടറി സംശയത്തിന്റെ നിഴലിലാണ്. സംസ്ഥാനത്തിന്റെ ചരിത്രത്തിലാദ്യമായാണ് ഇത്തരമൊരു വിവാദപരമായ കേസ് വരുന്നതെന്നും പ്രതിപക്ഷം നോട്ടീസിൽ ചൂണ്ടിക്കാണിക്കുന്നു.
എം.ശിവശങ്കര് വെറുതേ വന്നതല്ലെന്നും അദ്ദേഹത്തിന് മുഖ്യമന്ത്രിയുമായുള്ള ബന്ധം ലാവ്ലിന് കാലത്ത് തുടങ്ങിയതാണെന്നും പി ടി തോമസ് നിയമസഭയിൽ പറഞ്ഞു. ലാവ്ലിനില് അന്വേഷണം നടക്കുന്ന കാലത്ത് ഫയലുകള് ചോര്ത്തി നല്കിയതാണ് ശിവശങ്കറും മുഖ്യമന്ത്രിയും തമ്മിലുള്ള അടുപ്പത്തിന് കാരണമെന്നും പി.ടി തോമസ് ആരോപിച്ചു. മുഖ്യമന്ത്രി സ്വര്ണ്ണക്കള്ളക്കടത്തുകാരെ താലോലിക്കുകയാണെന്നും അദ്ദേഹം പറഞ്ഞു.
ഇ.എം.എസാണ് ആദ്യ മുഖ്യമന്ത്രിയെങ്കില് ജയിലില് കിടന്ന ആദ്യ മുഖ്യമന്ത്രി എന്ന വിശേഷണമാകും പിണറായിക്ക് ഉണ്ടാകുക. മുഖ്യമന്ത്രിയുടെ വീട്ടിലെ വിവാഹ തലേന്ന് സ്വപ്ന അവിടെ എത്തിയിരുന്നോ ഇല്ലയോ എന്ന് മുഖ്യമന്ത്രി വ്യക്തമാക്കണമെന്നും പി ടി തോമസ് ആവശ്യപ്പെട്ടു. ഉണ്ടെന്നോ ഇല്ലെന്നോ പറഞ്ഞാല് മതി. മുഖ്യമന്ത്രി പറയുന്നത് തങ്ങള് വിശ്വസിച്ചു കൊള്ളാമെന്നും അദ്ദേഹം പറഞ്ഞു.
മുഖ്യമന്ത്രി അധോലോക നായകനായി മാറരുത്. മുഖ്യമന്ത്രിയെ സ്വപ്നയ്ക്ക് പരിചയപ്പെടുത്തിയതാരെന്നും മുഖ്യമന്ത്രിയുമായി അടുപ്പമുള്ളവരില് നിന്ന് കേന്ദ്ര ഏജന്സികള് വിവരങ്ങള് തേടിയിട്ടുണ്ടോ എന്നും പി ടി തോമസ് ചോദിച്ചു. ധൃതരാഷ്ട്രരെപ്പോലെ പുത്രീ വാത്സല്യത്തില് മുഖ്യമന്ത്രി കേരളത്തെ നശിപ്പിക്കരുതെന്നും അദ്ദേഹം പറഞ്ഞു.
Discussion about this post