കോഴിക്കോട്: അയല്പക്കക്കാരുടെ സ്വകാര്യതയെ ബാധിക്കുന്ന തരത്തില് തൊട്ടപ്പുറത്തെ വീട്ടുകാര് കൂടുതല് സി സി ടി വി ക്യാമറകള് സ്ഥാപിക്കുന്നത് കോഴിക്കോട് ഒന്നാം അഡീഷണല് മുന്സിഫ് കോടതി താത്കാലികമായി തടഞ്ഞു. വിമുക്തഭടന് തൃക്കൈപ്പറമ്പത്ത് പ്രേമരാജന്റെ ഹര്ജിയിലാണ് ഉത്തരവ്.അയല്വീടുമായി ആറടി അകലം മാത്രമുള്ള തങ്ങളുടെ വീടിന്റെ ബാല്ക്കണിയിലേക്കടക്കം ഫോക്കസ് ചെയ്താണ് അയല്വാസി ക്യാമറമറകള് സ്ഥാപിച്ചിരിക്കുതെന്ന് കാട്ടിയായിരുന്നു ഹര്ജി. കിടപ്പുമുറിയില് വസ്ത്രം മാറുന്നതുള്പ്പെടെ മനഃപൂര്വം ക്യാമറയില് പകര്ത്തുകയാണ്. ഈ ദൃശ്യങ്ങള് പലരെയും കാണിക്കുന്നതായും അറിയുന്നു. കൂടുതല് ക്യാമറകള് സ്ഥാപിക്കുന്നത് തന്റെയും ഭാര്യയുടെയും 15 വയസുള്ള മകളുടെയും സ്വകാര്യതയിലേക്കുള്ള കടന്നുകയറ്റമാണെന്നും ഇത് തടയണമെന്നും ഹര്ജിയില് പറഞ്ഞിരുന്നു.
നേരത്തെ സ്ഥാപിച്ച സി സി ടി വി ക്യാമറകള് സ്വകാര്യത ഹനിക്കുന്നുണ്ടോയെന്ന് റിപ്പോര്ട്ട് സമര്പ്പിക്കാന് അഡ്വക്കേറ്റ് കമ്മിഷനെ നിയോഗിച്ചു. ക്യാമറയിലെ ദൃശ്യങ്ങള് മറ്റാരെയും കാണിക്കരുതെന്നും കോടതി നിര്ദ്ദേശിച്ചു.
കിടപ്പുമുറിയില് വസ്ത്രം മാറുന്നതിനിടയില് പിന്ഭാഗം അയല്വാസിയുടെ ക്യാമറയില് പതിഞ്ഞതിന്റ പേരില്വന്ന പോക്സോ കേസില് പ്രേമരാജന് അഞ്ചു ദിവസം ജയിലില് കഴിയേണ്ടി വന്നിരുന്നു. തന്റെ പന്ത്രണ്ടുകാരന് മകന് മുന്നില് നഗ്നത പ്രദര്ശിപ്പിച്ചെന്ന അയല്വാസിയുടെ പരാതിയില് പൊലീസ് പോക്സോ വകുപ്പ് ചുമത്തുകയായിരുന്നു.
തങ്ങളുടെ സ്വകാര്യതയെ ബാധിക്കുന്ന വിധത്തില് ക്യാമറകള് സ്ഥാപിച്ചതായി കാട്ടി പിന്നീട് പ്രേമരാജന് നല്കിയ പരാതിയില് അയല്വാസികളായ പി.ജിജി, ഭര്ത്താവ് അനുജിത്ത് രാമചന്ദ്രന് എന്നിവര്ക്കെതിരെ നടക്കാവ് പൊലീസ് കേസ് എടുത്തിരുന്നു. കള്ളക്കേസില് കുടുക്കി ജയിലിലാക്കിയതിന് നഷ്ടപരിഹാരം തേടി പ്രേമരാജന് മനുഷ്യാവകാശ കമ്മിഷനെയും സമീപിച്ചിരുന്നു.
Discussion about this post