തൃപ്പൂണിത്തുറ: ഉദയംപേരൂര് നടക്കാവില് വാടക വീട്ടില്നിന്ന് കള്ളനോട്ട് പിടികൂടിയ കേസില് അഞ്ചു കൂട്ടുപ്രതികളെ കൂടി പിടികൂടി. ഒരു കോടി 71 ലക്ഷം രൂപയുടെ കള്ളനോട്ടുകളുമായി കോയമ്പത്തൂരില് നിന്നാണ് പോലീസ് അറസ്റ്റ് ചെയ്തത്.
കോയമ്പത്തൂര് ഉക്കടം അല് അമീന് കോളനിയില് അഷറഫ് അലിയുടെ മകന് സെയ്ദ് സുല്ത്താന് (32), കോയമ്ബത്തൂര് സാറമേട് വള്ളാല്മേട് അബ്ദുള് ഖാദറിന്റെ മകന് അഷറഫ് അലി (29), തൃശൂര് ചാവക്കാട് സീന മന്സിലില് സെയ്ദ് മുഹമ്മദിന്റെ മകന് റഷീദ് (40) കോയമ്പത്തൂര് കറുപ്രിയല് കോവില് വസന്ത നഗര് സ്ട്രീറ്റില് സാലുദ്ദീന്റെ മകന് അസറുദ്ദീന് (29), കോയമ്പത്തൂര് കുറുമ്പോട് കാട് പള്ളി സ്ട്രീറ്റ് നമ്പര് 3/28ല് മുഹമ്മദ് ഇബ്രാഹിമിന്റെ മകന് റിസാദ് (30) എന്നിവരാണ് പിടിയിലായത്. രണ്ടായിരത്തിന്റെ 8550 നോട്ടുകളാണ് ചാക്കില് കെട്ടി സൂക്ഷിച്ച നിലയില് ഇവരില്നിന്ന് പോലീസ് കണ്ടെടുത്തത്.
കഴിഞ്ഞ മാസം 28ന് നടക്കാവില് വാടക വീട്ടില് താമസിച്ചിരുന്ന പ്രിയന് കുമാറിനെ (36) രണ്ടായിരത്തിന്റെ 86 നോട്ടുകളുമായി അറസ്റ്റു ചെയ്തിരുന്നു. പ്രിയന് കുമാറിന്റെ ഭാര്യയുടെ ബന്ധുവായ ചവറ പന്മന കണ്ണങ്കര ഭാഗം വാവസദനത്തില് ധന്യ (33), ധന്യയുടെ ഭര്ത്താവ് വിദ്യാധരന് (42) പ്രിയന്കുമാാറിന് കള്ള നോട്ട് നല്കിയിരുന്ന ഇടനിലക്കാരന് ചെട്ടിതോട്ടത്തില് ചാലക്കുടി സ്വദേശി വിനോദ് എന്നിവരെ ഉദയംപേരൂര് പോലീസ് നേരത്തെ അറസ്റ്റ് ചെയ്തിരുന്നു.
വിനോദില് നിന്ന് കിട്ടിയ വിവരം അനുസരിച്ച് നടത്തിയ അനേ്വഷണത്തിലാണ് അഞ്ച് പേര് കൂടി പിടിയിലായത്.
ഉദയംപേരൂര് സി.ഐ ജോസഫ് ലിയോണ്, എസ്.ഐമാരായ എസ്.വി ബിജു, വി.കെ രാജീവ്, കെ.അനില് ,സി.പി.ഒമാരായ കെ.എം സാബു, ജയശങ്കര്, ഗുജ്റാള് സി.ദാസ്, കെ.പി ദീപേഷ് എന്നിവര് ചേര്ന്നാണ് പ്രതികളെ പിടികൂടിയത്.
നോട്ട് അച്ചടിക്കാന് ഉപയോഗിച്ച പ്രിന്റര്, കമ്പ്യൂട്ടര്, പേപ്പറുകള് എന്നിവയും കണ്ടെടുത്തിട്ടുണ്ട്.
Discussion about this post