ഡൽഹി: കൊവിഡ് ബാധയെ തുടർന്ന് ഐപിഎൽ താരത്തിന്റെ പിതാവ് മരിച്ചു. രാജസ്ഥാൻ റോയൽസ് താരം ചേതൻ സക്കരിയയുടെ പിതാവ് സക്കരിയയാണ് മരിച്ചത്.
മരണം ദൗർഭാഗ്യകരമാണെന്നും ഈ അവസരത്തിൽ ചേതന് എല്ലാവിധത്തിലുമുള്ള പിന്തുണ വാഗ്ദാനം ചെയ്യുകയാണെന്നും രാജസ്ഥാൻ റോയൽസ് ടീം മാനേജ്മെന്റ് അറിയിച്ചു. ഐപിഎൽ നിലവിലെ സീസണിൽ ചേതൻ സക്കരിയ 7 വിക്കറ്റ് വീഴ്ത്തിയിരുന്നു.
കഴിഞ്ഞ ജനുവരിയിൽ ചേതന്റെ സഹോദരനും മരിച്ചിരുന്നു. ചേതൻ സയ്യദ് മുഷ്താഖ് അലി ട്രോഫിയിൽ കളിക്കുന്ന സമയത്തായിരുന്നു സഹോദരന്റെ മരണം.
ഇന്ത്യൻ വനിതാ ക്രിക്കറ്റ് താരം വേദ കൃഷ്ണമൂർത്തിയുടെ മാതാവും സഹോദരിയും നേരത്തെ കൊവിഡ് ബാധിച്ച് മരിച്ചിരുന്നു. വിവിധ ടീമുകളിലെ കളിക്കാർക്കും സ്റ്റാഫിനും രോഗബാധ സ്ഥിരീകരിച്ചതോടെ ഇത്തവണത്തെ ഐപിഎൽ മത്സരങ്ങൾ അനിശ്ചിതകാലത്തേക്ക് മാറ്റി വെച്ചിരിക്കുകയാണ്.
