സുപ്രധാന ചുവടുവയ്പ്പായി ആന്റിബോഡി മരുന്ന് കേരളത്തിലും; ഒരു ഡോസ് മരുന്നിന് 59,750 രൂപ; കുത്തിവെച്ചത് ചികിത്സയിലുള്ള ഡോക്ടറിൽ

പത്തനംതിട്ട: കോവിഡ് ചികിത്സയിൽ സുപ്രധാന ചുവടുവയ്പ്പായി ആന്റിബോഡി മരുന്നായ കാസിരിവിമാബ് – ഇംഡെവിമാബ് പത്തനംതിട്ട ജനറൽ ആശുപത്രിയിൽ ചികിത്സയിലുള്ള ഡോക്ടറിൽ കുത്തിവച്ചു. ആന്റി സാർസ് കോവ് – 2 വിഭാഗത്തിൽ ഉൾപ്പെടുന്ന ആന്റിബോഡി മരുന്ന് സംസ്ഥാനത്ത് ആദ്യമായാണ് സർക്കാർ ആശുപത്രിയിൽ കോവിഡ് ചികിത്സയ്ക്ക് ഉപയോഗിക്കുന്നത്.

ഒരു ഡോസ് മരുന്നിന് 59,750 രൂപയാണ് വില. 1.10 ലക്ഷം രൂപ മുടക്കിയാണ് 2 ഡോസ് അടങ്ങുന്ന വയൽ (കുപ്പി) പത്തനംതിട്ട ജനറൽ ആശുപത്രിയിൽ എത്തിച്ചത്. കോവിഡ് മൂലം ശരീരത്തിൽ സ്വാഭാവികമായ ആന്റി ബോഡി ഉൽപാദിപ്പിക്കപ്പെടുന്നതിന് മുൻപ് തന്നെ ഈ മരുന്ന് ആന്റി ബോഡി സൃഷ്ടിച്ചു കോവിഡ് വൈറസുകളെ നേരിടും. ഇതുമൂലം വൈറസുകൾ ശരീരത്തിൽ പെരുകുന്നത് പൂർണമായും തടയപ്പെടും.

കോവിഡ് പോസിറ്റീവായി ആദ്യ 72 മണിക്കൂറിലാണ് മരുന്നു കൂടുതൽ ഫലപ്രദം. ശരീരത്തിൽ വൈറസ് നെഗറ്റീവായ ശേഷം കുത്തിവയ്ക്കുന്നതു കൊണ്ട് കാര്യമായ ഗുണമില്ല. പത്തനംതിട്ട ജനറൽ ആശുപത്രിയിലെ തന്നെ ഡോക്ടറിലാണ് മരുന്ന് കുത്തിവച്ചത്. മരുന്ന് ഫലം കണ്ടു തുടങ്ങിയെന്നു ചികിത്സയ്ക്കു നേതൃത്വം നൽകുന്ന ഡോ.അരുൺ ജൂഡ് അൽഫോൻസ് മനോരമയോടു പറഞ്ഞു. വയലിൽ അവശേഷിക്കുന്ന രണ്ടാമത്തെ ഡോസ് സർക്കാർ മേഖലയിൽ തന്നെയുള്ള ഫാർമസിസ്റ്റിൽ കുത്തിവയ്ക്കും.

പന്തളത്ത് ചികിത്സയിലുള്ള ഇദ്ദേഹത്തെ പത്തനംതിട്ട ജനറൽ ആശുപത്രിയിലേക്ക് മാറ്റും. പ്രമേഹം അടക്കമുള്ള ശാരീരിക പ്രയാസങ്ങളുള്ള ഇദ്ദേഹത്തിന് പോസിറ്റീവ് ആയിട്ട് 3 ദിവസമായതേയുള്ളു. മരുന്നു കുത്തിവയ്ക്കാൻ ഫലപ്രദമായ സമയമാണിത്. പ്രമേഹ രോഗികൾ, ഡയാലിസിസ് ചെയ്യുന്നവർ, കീമോതെറപ്പി ചെയ്യുന്നവർ തുടങ്ങിയവരിൽ നടത്തിയ പരീക്ഷണത്തിൽ കോവിഡ് വൈറസുകൾ വ്യാപനം 70% തടയപ്പെട്ടതായി കണ്ടെത്തിയിട്ടുണ്ട്.

അമേരിക്കൻ പ്രസിഡന്റായിരിക്കെ ഡോണൾഡ് ട്രംപിന് കോവിഡ് ചികിത്സയുടെ ഭാഗമായി കുത്തിവച്ചതിലൂടെയാണ് കാസിരിവിമാബ് – ഇംഡെവിമാബ് വാർത്തകളിൽ നിറയുന്നത്. കഴിഞ്ഞ മേയ് 25ന് ആണ് ആദ്യമായി ഇന്ത്യയിൽ കുത്തിവയ്ക്കുന്നത്. അമേരിക്കയിലെ കോവിഡ് ചികിത്സാ മാനദണ്ഡത്തിൽ ഈ മരുന്ന് നിർദേശിച്ചിട്ടുണ്ടെങ്കിലും ഇന്ത്യയിലെ ചികിത്സാ ക്രമത്തിൽ മരുന്ന് ഇതുവരെ ഉൾപ്പെടുത്തിയിട്ടില്ല.

മരുന്നിന്റെ വില തന്നെയാണ് പ്രധാന വെല്ലുവിളി. സിപ്ലയാണ് ഈ മരുന്നിന്റെ ഇന്ത്യയിലെ നിർമാതാക്കൾ. കൊറോണ വൈറസുകളെ നേരിടുന്നതിന് ആവശ്യമായ ജനിതക ഭേദം വരുത്തിയ 2 ആന്റിബോഡികളുടെ സമ്മിശ്രമാണ് ഈ മരുന്ന്. മനുഷ്യ ശരീരം സ്വയം ഉൽപാദിപ്പിക്കുന്നതിനു സമാനമായ ആന്റിബോഡിയാണ് മരുന്ന് ഉൽപാദിപ്പിക്കുന്നത്.