കോട്ടയം : മണിമല പാലത്തില് നിന്നും മണിമലയാറ്റിലേയ്ക്ക് ചാടിയ വില്ലേജ് ഓഫീസറും ജോയിന്റ് കൗണ്സില് മുന് കോട്ടയം ജില്ലാ പ്രസിഡന്റുമായ പ്രകാശന് കങ്ങഴയുടെ മൃതദേഹം ഇന്ന് രാവിലെയാണ് മണിമലയാറ്റില് നിന്നും ലഭിച്ചത്. നിലവില് ചങ്ങനാശേരി താലൂക്ക് ഓഫിസില് സ്പെഷ്യല് വില്ലേജ് ഓഫിസറായിരുന്നു ഇദ്ദേഹം. അടുത്തിടെയാണ് ഇദ്ദേഹത്തിന് വില്ലേജ് ഓഫിസറായി സ്ഥാനക്കയറ്റം ലഭിച്ചത്.
തിങ്കളാഴ്ച രാവിലെ പത്തു മണിയോടെയായിരുന്നു സംഭവം. ചങ്ങനാശേരിയിലെ ഓഫിസിലേയ്ക്കു പോകുന്നതിനായാണ് ഇദ്ദേഹം വീട്ടില് നിന്നും ഇറങ്ങിയത്. തുടര്ന്നു, മണിമല പാലത്തില് എത്തി ഇവിടെ ബാഗ് വച്ച ശേഷം ആറ്റില് ചാടുകയായിരുന്നു. ഇതുകണ്ടുകൊണ്ട് ഇതുവഴി എത്തിയ ഇതര സംസ്ഥാന തൊഴിലാളി ഇദ്ദേഹത്തെ രക്ഷിക്കാന് ഒപ്പം ആറ്റിലേയ്ക്ക് ചാടി. എന്നാല്, കയ്യില് പിടുത്തം കിട്ടും മുന്പ് പ്രകാശന് ആറ്റിലേയ്ക്ക് മുങ്ങിത്താഴുകയായിരുന്നു.
തുടര്ന്ന് അഗ്നിരക്ഷാ സേനയുടെ സഹായത്തോടെ രണ്ടു ദിവസം തിരച്ചില് നടത്തിയെങ്കിലും കണ്ടെത്താനായില്ല. ഇന്ന് രാവിലെ മൃതദേഹം വെള്ളത്തിനു മുകളില് ഉയരുകയായിരുന്നു .
നേരത്തെ കൊവിഡ് ബാധിതനായിരുന്ന അദ്ദേഹം അടുത്തിടെയാണ് രോഗവിമുക്തനായത്. ഇതേ തുടര്ന്നുള്ള മാനസിക ബുദ്ധിമുട്ടുകള് ഇദ്ദേഹം അനുഭവിച്ചിരുന്നതായി സഹപ്രവര്ത്തകര് പറയുന്നു. ഇതേ തുടര്ന്നാവാം ഇദ്ദേഹം ആറ്റില് ചാടിയതെന്നു സംശയിക്കുന്നുണ്ട്.
