തിരുവനന്തപുരം: കൊടകര കവർച്ചാ കേസിന്റെ മറവിൽ ബിജെപിയെ തകർക്കാൻ ഗൂഢാലോചന നടക്കുന്നതായി നേതാക്കൾ. ഇതുമായി ബന്ധപ്പെട്ട് പാർട്ടി ഗവർണ്ണർക്ക് നിവേദനം നൽകി.
കൊടകര കവർച്ചാ കേസുമായി ബന്ധിപ്പിച്ച്, ബിജെപിയെ തകർക്കാനുള്ള ഉദ്ദേശ്യത്തോടെ പിണറായി സർക്കാർ പോലീസിനെ ഉപയോഗിച്ച് നടത്തുന്ന വ്യാജ പ്രചരണങ്ങളും അനാവശ്യ ചോദ്യം ചെയ്യലുകളും ഗൂഢാലോചനയും വിശദീകരിച്ചാണ് ബി ജെ പി സംസ്ഥാന നേതാക്കൾ ഗവർണ്ണർക്ക് നിവേദനം നൽകിയത്.
മുതിർന്ന ബിജെപി നേതാക്കളായ ഒ.രാജഗോപാൽ, കുമ്മനം രാജശേഖരൻ, സംസ്ഥാന ജനറൽ സെക്രട്ടറി പി. സുധീർ, ജില്ലാ അധ്യക്ഷൻ വി.വി. രാജേഷ്, സംസ്ഥാന സെക്രട്ടറി എസ്. സുരേഷ് എന്നിവരടങ്ങുന്ന സംഘമാണ് ഗവർണർക്ക് നിവേദനം നൽകിയത്.
പാർട്ടിയെ തകർക്കാനുള്ള ഒരു ശ്രമങ്ങളും വിലപ്പോവില്ലെന്നും ഇത് പാർട്ടി ഒറ്റക്കെട്ടായി നേരിടുമെന്നും ബിജെപി നേതാവ് കുമ്മനം രാജശേഖരൻ പറഞ്ഞു. അന്വേഷണ ഉദ്യോഗസ്ഥർ ഹൈക്കോടതി ഉത്തരവിന് വിരുദ്ധമായി പ്രവർത്തിക്കുകയാണെന്നും അദ്ദേഹം കുറ്റപ്പെടുത്തി.
