ക്വാലാലംപൂര്: കൊറോണ വൈറസിന്റെ ഡെല്റ്റ വകഭേദത്തേക്കാള് മാരകമാണ് ലാംബ്ഡ (Lambda) വകഭേദം എന്ന് റിപ്പോര്ട്ട്. കഴിഞ്ഞ ഒരാഴ്ചയ്ക്കുള്ളല് മുപ്പതിലധികം രാജ്യങ്ങളില് ഇത് സാന്നിധ്യമറിയിച്ചിട്ടുണ്ടെന്നും, ഡെല്റ്റ വകഭേദത്തേക്കാള് മാരകവും രോഗവ്യാപന ശേഷി കൂടിയതുമാണെന്നും മലേഷ്യന് ആരോഗ്യ മന്ത്രാലയം വ്യക്തമാക്കി.
ലാംബ്ഡാ ആദ്യമായി റിപ്പോര്ട്ടു ചെയ്ത പെറുവിലാണ് ലോകത്തെ ഏറ്റവും ഉയര്ന്ന മരണനിരക്കുള്ളതെന്നും, മേയ്, ജൂണ് മാസങ്ങളില് പെറുവില് റിപ്പോര്ട്ട് ചെയ്യുന്ന കോവിഡ് കേസുകളില് 82 ശതമാനവും ലാംബ്ഡ വകഭേദം മൂലമുള്ളതാണെന്നും മലേഷ്യന് ആരോഗ്യ മന്ത്രാലയം ചൂണ്ടിക്കാട്ടി. ഡെല്റ്റ വകഭേദത്തേക്കാള് രോഗവ്യാപന ശേഷി കൂടിയതാണ് ലാംബ്ഡയെന്നാണ് ഗവേഷകര് ഭയപ്പെടുന്നതെന്നും മന്ത്രാലയം പറഞ്ഞു.
മറ്റൊരു ദക്ഷിണ അമേരിക്കന് രാജ്യമായ ചിലിയില് മേയ്, ജൂണ് മാസങ്ങളില് റിപ്പോര്ട്ട് ചെയ്ത കോവിഡ് കേസുകളില് 31 ശതമാനവും ലാംബ്ഡ വകഭേദം മൂലമുള്ളതാണ്. ബ്രിട്ടനില് ലാംബ്ദ വകഭേദം കണ്ടെത്തിയ കാര്യവും മലേഷ്യന് ആരോഗ്യ മന്ത്രാലയം ചൂണ്ടിക്കാട്ടുന്നുണ്ട്.
ഫെബ്രുവരി 23 മുതല് ജൂണ് ഏഴ് വരെ രാജ്യത്താകെ ആറു ലാംബ്ഡ കേസുകള് കണ്ടെത്തിയിട്ടുണ്ടെന്നായിരുന്നു റിപ്പോര്ട്ട്. ഇതേ തുടര്ന്ന് കൊറോണ വൈറസിന്റെ പുതിയ വകഭേദമായ ലാംബ്ഡയെ അണ്ടര് ഇന്വെസ്റ്റിഗേഷന് (വിയുഐ) പട്ടികയില് ചേര്ത്തതായി ബ്രിട്ടനിലെ ആരോഗ്യ വിഭാഗം അറിയിച്ചിരുന്നു.
ചിലി, പെറു, ഇക്വഡോര്, അര്ജന്റീന തുടങ്ങിയ തെക്കേ അമേരിക്കന് രാജ്യങ്ങളിലെ ശാസ്ത്രജ്ഞരാണ് ഈ വകഭേദം കണ്ടെത്തിയത്. സ്പൈക്ക് പ്രോട്ടീനില് ലാംബ്ഡ വകഭേദം ഒന്നിലധികം മ്യൂട്ടേഷനുകള് കാണിക്കുന്നുവെന്നാണ് വിദഗ്ദ്ധര് പറയുന്നത്.
Discussion about this post