തൃശൂര്: കോടികളുടെ വായ്പാ ക്രമക്കേട് കണ്ടെത്തിയ കരുവന്നൂര് സഹകരണ ബാങ്കിലെ സി.പി.എം നിയന്ത്രണത്തിലുള്ള ഭരണസമിതി പിരിച്ചുവിട്ട് അഡ്മിനിസ്ട്രേറ്റര് ഭരണം ഏര്പ്പെടുത്തി. ഒക്ടോബറില് ഭരണസമിതിയുടെ കാലാവധി അവസാനിക്കാനിരിക്കെയാണ് പിരിച്ചുവിടല്. സി.പി.എം നേതാവ് കെ.കെ. ദിവാകരന് പ്രസിഡന്റായുള്ള ഭരണസമിതിയാണ് ജില്ല രജിസ്ട്രാര് പിരിച്ചുവിട്ട് മുകുന്ദപുരം അസിസ്റ്റന്റ് രജിസ്ട്രാര് (ജനറല്) എം.സി. അജിത്തിനെ അഡ്മിനിസ്ട്രേറ്ററായി നിയോഗിച്ചത്.
വായ്പ തട്ടിപ്പുമായി ബന്ധപ്പെട്ട് ഉയര്ന്ന ആരോപണങ്ങളില് സഹകരണ വകുപ്പ് നടത്തിയ അന്വേഷണത്തില് വ്യാപക ക്രമക്കേട് കണ്ടെത്തിയിരുന്നതിനെ തുടര്ന്ന് ബാങ്ക് സെക്രട്ടറിയടക്കം നാല് ജീവനക്കാരെ സസ്പെന്ഡ് ചെയ്തിരുന്നു. ഇവരടക്കം ആറുപേര്ക്കെതിരെ കേസെടുത്തെങ്കിലും വകുപ്പുതല അന്വേഷണത്തിന്റെ നടപടിക്രമങ്ങള് പൂര്ത്തിയായിരുന്നില്ല.
2011ല് പ്രസിഡന്റായ കെ.കെ. ദിവാകരന്റെ നേതൃത്വത്തിലുള്ള ഭരണസമിതി 2016ല് വീണ്ടും അധികാരത്തിലെത്തുകയായിരുന്നു. 2014 മുതല് 2020 വരെയുള്ള കാലഘട്ടത്തിലാണ് ബാങ്കില് വന് ക്രമക്കേട് നടന്നതായി കണ്ടെത്തിയത്.
Discussion about this post