കോട്ടയം : ബീഫ് വിവാദത്തില്‍ കേരളത്തിലെ ബിജെപി നേതൃത്വത്തിനതിരെ എതിരാളികള്‍ ഉയര്ത്തിക്കാട്ടിയിരുന്ന ഒരു ഫോട്ടോയെ കുറിച്ചാണ് കെ, സുരേന്ദ്രന്റെ വിശദീകരണം. കെ. സുരേന്ദ്രനും സുഹൃത്തുക്കളും ഹോട്ടലില്‍ നിന്നും ഭക്ഷണം കഴിക്കുന്ന ചിത്രം സോഷ്യല്‍ മീഡിയില്‍ പ്രചരിച്ചിരുന്നു. കെ സുരേന്ദ്രന്‍ കഴിക്കുന്നത് ബീഫാണെന്ന അടികുറിപ്പോടെയായിരുന്നു പ്രചരണം. ഇതോടെ ഇക്കാര്യത്തില്‍ വിശദീകരണവുമായി ബിജെപി നേതാവ് കെ.സുരേന്ദ്രന്‍ തന്നെ രംഗത്തെത്തിയിരിക്കുകയാണ്. ചിത്രത്തില്‍ കാണുന്നത് ബീഫ് അല്ലെന്നും ഉള്ളിക്കറിയാണെന്നും സുരേന്ദ്രന്‍ പറയുന്നു.
തിരഞ്ഞെടുപ്പ് സമയത്ത് സസ്യാഹാരം മാത്രമേ കഴിക്കാറുള്ളൂ എന്നും ജീവിതത്തില്‍ ബീഫ് കഴിച്ചിട്ടില്ലെന്നും സുരേന്ദ്രന്‍ ഫേസ് ബുക്കില്‍ കുറിച്ചു. തിരഞ്ഞെടുപ്പു പ്രചാരണ സമയത്തെന്നോ തട്ടുകടയില്‍ നിന്നും വാങ്ങിക്കഴിച്ച ഉള്ളിക്കറിയും പൊറോട്ടയും സോഷ്യല്‍ മീഡിയയില്‍ ‘ബീഫ് കഴിക്കുന്ന കേരളത്തിലെ ബിജെപി നേതാവ്’ എന്നു പറഞ്ഞു ഡല്‍ഹി വരെ വൈറലായിരുന്നുവെന്നും അദ്ദഹം പറയുന്നു.
പൂര്‍ണരൂപം-
ഇതു പോലെ ഇരുപതു പശുക്കളെ എന്റെ വീട്ടില്‍ വളര്‍ത്തി പരിപാലിക്കുന്നുണ്ട്. തെരഞ്ഞെടുപ്പു പ്രചാരണ സമയത്തെന്നോ തട്ടുകടയില്‍ നിന്നും വാങ്ങിക്കഴിച്ച ഉള്ളിക്കറിയും പൊറോട്ടയും സോഷ്യല്‍ മീഡിയയില്‍ ‘ബീഫ് കഴിക്കുന്ന കേരളത്തിലെ ബി ജെ പി നേതാവ്’ എന്നു പറഞ്ഞു ഡെല്‍ഹി വരെ വൈറലായിരുന്നു. അതിലെ അതിശയോക്തി എന്താണെന്നു ചോദിച്ചാല്‍ ഞാന്‍ തെരഞ്ഞെടുപ്പു സമയത്ത് സസ്യാഹാരം മാത്രമേ കഴിക്കാറുള്ളൂ എന്നതും ജീവിതത്തില്‍ ബീഫ് കഴിച്ചിട്ടില്ല എന്നതുമാണ്.
കേരളത്തിലെ ബീഫ് വിവാദം:
ഇന്ത്യയില്‍ ബീഫ് (പശു, കാള, പശുകിടാവ്) ഇവയുടെ കയറ്റുമതി നിരോധിച്ചിട്ടുണ്ട്. അതില്‍ നിന്നും ബീഫ് കയറ്റുമതി നരേന്ദ്ര മോദി ഗവണ്മെന്റിന്റെ ആദ്യ വര്‍ഷം 15.4 % കൂടിയിട്ടുണ്ട് എന്ന് പറയുന്നതില്‍ സത്യമേതുമില്ല. എന്നാല്‍ എരുമ, പോത്ത്, ആട്, ചെമ്മരിയാട്, ഇവയുടെ മാംസം കയറ്റി അയക്കുന്നതില്‍ വിലക്കൊന്നുമില്ല. ഇന്ത്യയില്‍ പത്തു സംസ്ഥാനങ്ങളില്‍ മാത്രമാണ് അറവുശാല അനുവദനീയമായിട്ടുള്ളത്. ഈ സംസ്ഥാനങ്ങള്‍ക്കു മാത്രമേ ബീഫ് (മുകളില്‍ പറഞ്ഞിരിക്കുന്നവ മാത്രം, ഗോമാംസമില്ല) കയറ്റിയയക്കാന്‍ അനുമതിയുള്ളൂ. യു പി, ഡല്‍ഹി, മഹാരാഷ്ട്ര, തെലുങ്ങാന, പഞ്ചാബ്, ആന്ധ്ര പ്രദേശ്, വെസ്റ്റ് ബംഗാള്‍, ബീഹാര്‍, നാഗാലാ!ന്‍ഡ്, കേരള, ഇവയാണ് ആ സംസ്ഥാനങ്ങള്‍. കേരളത്തിലെ ബീഫിന്റെ മേലുള്ള അഭ്യാസങ്ങള്‍ രാഷ്ട്രീയ ഒത്തുതീര്‍പ്പിന്റെ ഭാഗമല്ലേ? ബീഫില്‍ സോളാറും ബാറും തുടങ്ങി എല്ലാ അഴിമതികളും മറച്ചു ജനങ്ങളുടെ കണ്ണില്‍ മണ്ണിടാനുള്ള കോണ്‍ഗ്രസ് കമ്മ്യൂണിസ്റ്റ് ഒളിച്ചുകളി മാത്രം. ജനങ്ങളെ ഇനിയും വിഡ്ഢികളാക്കാമെന്നാണ് ഇക്കൂട്ടര്‍ കരുതുന്നെങ്കില്‍ അവര്‍ ജനങ്ങളുടെ അവബോധ/ ഇഛാ ശക്തിയെ തരം താഴ്ത്തി കാണുന്നതുകൊണ്ടു മാത്രം.
Discussion about this post