കൊച്ചി: കോൺഗ്രസ് ദേശീയ നേതൃത്വത്തിനും നെഹ്രു കുടുംബത്തിനുമെതിരെ രൂക്ഷവിമർശനവുമായി സാഹിത്യകാരൻ ടി പത്മനാഭൻ. കോൺഗ്രസിന്റെ പരാജയകാരണം കോൺഗ്രസുകാർ തന്നെയാണെന്നും, അതിനിനി വേറെ ആരെയും കുറ്റം പറയേണ്ട കാര്യമില്ലെന്നും അദ്ദേഹം പറഞ്ഞു. അട്ടയെപ്പോലെ ചിലർ അധികാരത്തിൽ കടിച്ച് തൂങ്ങിയതാണ് തോൽവികൾക്ക് പിന്നാലെയുള്ള തോൽവികൾക്ക് കാരണമെന്നും ടി പത്മനാഭൻ പരിഹസിച്ചു.
പോൾ പി മാണി ലൈബ്രറിയുടെയും സബർമതി പഠനഗവേഷണകേന്ദ്രത്തിന്‍റെയും ഉദ്ഘാടനുബന്ധിച്ച് എറണാകുളം ഡിസിസി സംഘടിപ്പിച്ച പരിപാടിയിൽ പ്രതിപക്ഷനേതാവ് വി ഡി സതീശൻ, എം എം ഹസ്സൻ തുടങ്ങിയ നേതാക്കൾ വേദിയിലിരിക്കെയാണ് ടി പത്മനാഭൻ വിമർശനം ഉന്നയിച്ചത്. അമേഠിയിൽ സ്ഥിരമായി ജയിക്കുമെന്ന് രാഹുൽ ധരിച്ചു. ഒടുവിൽ സ്മൃതി ഇറാനി അവിടെ ജയിച്ച്, രാഹുലിന് വയനാട്ടിലേക്ക് വരേണ്ടി വന്നു. റോബർട്ട് വദ്ര രാഷ്ട്രീയത്തിലിറങ്ങുമെന്ന് നേരത്തേ പ്രഖ്യാപിച്ചിരുന്നു. ഇനി വദ്ര വരാത്ത കുറവേ കോൺഗ്രസിനുള്ളൂവെന്നും ടി പത്മനാഭൻ പരിഹസിച്ചു.
ആർത്തിയും ദുരാർത്തിയും ദുരാശയുമാണ് ഇപ്പോഴത്തെ കോൺഗ്രസ് നേതൃത്വത്തിനുള്ളത്. രണ്ട് സീറ്റാ സാർ കിട്ടിയത്. രാഹുൽ ഗാന്ധിജി തോറ്റത്, സ്ഥിരമായി അമേഠി കിട്ടുമെന്ന് കരുതിയിരുന്നിട്ടാണ്. സ്മൃതി ഇറാനിക്ക് ഞാൻ ഹാറ്റ്‍സ് ഓഫ് പറയുന്നു. തോറ്റ ശേഷം സ്ഥിരമായി അവരാ മണ്ഡലത്തിൽ പോയി. അവിടെ പ്രവർത്തിച്ചു. രാഹുലോ, അഞ്ച് വർഷത്തിന് ശേഷമാണ് പിന്നെ അവിടെ പോയത്. ടി പത്മനാഭൻ ചൂണ്ടിക്കാട്ടി.
അധികാരത്തോടുള്ള ചിലരുടെ താത്പര്യമാണ് പാർട്ടിയെ തകർക്കുന്നതെന്നും ടി പത്മനാഭൻ പറഞ്ഞു. എഐസിസി ജനറൽ സെക്രട്ടറി താരീഖ് അൻവർ എന്താകും ഇനി കോൺഗ്രസിന്റെ ഭാവി എന്നെന്നോട് ചോദിച്ചു. ഇങ്ങനെ പോയാൽ കോൺഗ്രസ് രക്ഷപ്പെടാനുള്ള സാധ്യത തുലോം വിരളമായിരിക്കും എന്ന് ഞാൻ പറഞ്ഞു. അദ്ദേഹം കൂട്ടിച്ചേർത്തു.
Discussion about this post