തിരുവനന്തപുരം: കേരളത്തിലെ ബിജെപി പ്രവർത്തകരുടെ ത്യാഗത്തെ അഭിനന്ദിച്ച് കേന്ദ്ര ആഭ്യന്തരമന്ത്രി അമിത് ഷാ. തിരുവനന്തപുരത്ത് പട്ടികജാതി സംഗമത്തിൽ പങ്കെടുക്കവേ ആയിരുന്നു അമിത് ഷാ കേരളത്തിൽ ബിജെപി പ്രവർത്തകർ അഭിമുഖീകരിക്കുന്ന വെല്ലുവിളികൾ ചൂണ്ടിക്കാട്ടിയത്.
രാജ്യത്ത് മറ്റിടങ്ങളിൽ ബിജെപിക്ക് വേണ്ടി പ്രവർത്തിക്കാൻ രാഷ്ട്രഭക്തി മാത്രം മതി. പക്ഷെ കേരളത്തിൽ പ്രവർത്തിക്കാൻ രാഷ്ട്രഭക്തിയും ബലിദാനം നൽകാനുള്ള മനസ്സും ധൈര്യവും വേണമെന്നായിരുന്നു അമിത് ഷായുടെ വാക്കുകൾ. മഹാത്മാ അയ്യൻകാളിയുടെ ഈ മണ്ണിൽ നിൽക്കുമ്പോൾ, കേരളത്തിലെ ബി.ജെ.പിയുടെ പ്രവർത്തകരെ ഞാൻ അഭിനന്ദിക്കുകയാണെന്ന് പറഞ്ഞുകൊണ്ടായിരുന്നു അദ്ദേഹത്തിന്റെ വാക്കുകൾ.
ബിജെപി സർക്കാരുകൾ പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ ദളിത്, ആദിവാസി വിഭാഗങ്ങളുടെ ക്ഷേമത്തിനായി പൂർണ്ണ സമർപ്പണം നടത്തിയിരിക്കുകയാണെന്ന് അമിത് ഷാ സൂചിപ്പിച്ചു. കേരളത്തിലും താമര വെന്നികൊടി പാറിക്കുന്ന ദിനം വിദൂരമല്ലെന്നും അദ്ദേഹം കൂട്ടിച്ചേർത്തു.
ചടങ്ങിൽ പദ്മശ്രീ എംകെ കുഞ്ഞോൽ മാഷിനെ അദ്ദേഹം പൊന്നാട അണിയിച്ച് ആദരിച്ചു. ബിജെപി സംസ്ഥാന അദ്ധ്യക്ഷൻ കെ. സുരേന്ദ്രൻ ജില്ലാ അദ്ധ്യക്ഷൻ വിവി രാജേഷ് സംസ്ഥാന പ്രഭാരി സിപി രാധാകൃഷ്ണൻ തുടങ്ങിയവരും പരിപാടിയിൽ പങ്കെടുത്തു.
Discussion about this post