ആലപ്പുഴ: ഭാരത് ജോഡോ യാത്രയ്ക്കിടെ ആലപ്പുഴ പുന്നമടയിൽ ആവേശത്തോടെ വളളം തുഴഞ്ഞ് രാഹുൽ. നെഹ്‌റു ട്രോഫി തുഴച്ചിലുകാർക്കൊപ്പം സമയം ചിലവിട്ട ശേഷമായിരുന്നു രാഹുൽ പ്രദർശന വളളം കളിയിൽ പങ്കെടുത്തത്.
രണ്ട് വളളങ്ങളിൽ ഒന്നിൽ തുഴച്ചിൽകാരനായി രാഹുലും ഇടംപിടിച്ചു. എഐസിസി ജനറൽ സെക്രട്ടറി കെ. സി വേണുഗോപാൽ ഉൾപ്പെടെയുളളവരും രാഹുലിനൊപ്പം ഉണ്ടായിരുന്നു. ആവശത്തോടെ വളളം തുഴയുന്ന രാഹുലിന്റെ വീഡിയോ കോൺഗ്രസ് സമൂഹമാദ്ധ്യമങ്ങളിൽ പോസ്റ്റ് ചെയ്യുകയും ചെയ്തു.
എന്നാൽ ഭാരതത്തെ ഒന്നിപ്പിക്കാനെന്ന പേരിൽ യാത്ര നടത്തുന്ന രാഹുൽ വളളംകളിയും യാത്രയുടെ സ്വീകരണ സ്ഥലങ്ങളിൽ ഒരുക്കുന്ന കേരളത്തിന്റെ കലാപ്രകടനങ്ങളും ആസ്വദിക്കുന്നതല്ലാതെ പൊതുസമൂഹത്തിന് പ്രയോജനകരമായ ഒരു ഇടപെടലും നടത്തുന്നില്ലെന്ന വിമർശനങ്ങളാണ് സമൂഹമാദ്ധ്യമങ്ങളിൽ ഉയരുന്നത്.
യാത്ര തുടങ്ങി ദിവസങ്ങൾ പിന്നിട്ടിട്ടും കേരളത്തിലെ പൊതുസമൂഹം നേരിടുന്ന ഒരു പ്രശ്‌നം പോലും ചർച്ചയാക്കാൻ കോൺഗ്രസിന് കഴിഞ്ഞിട്ടില്ല. ഇതിനിടയിലാണ് വളളംകളിയുടെ ചിത്രങ്ങളും വീഡിയോകളും പുറത്തുവരുന്നത്. ഇങ്ങനെ തുഴഞ്ഞ് എന്ന് കരയ്്ക്ക് അടുക്കാനാണെന്നാണ് സമൂഹമാദ്ധ്യമങ്ങളിൽ ഉയരുന്ന ചോദ്യം.
രാവിലെ ആലപ്പുഴ വാടക്കൽ കടപ്പുറത്ത് മത്സ്യത്തൊഴിലാളികളുമയി രാഹുൽ ആശയവിനിമയം നടത്തിയിരുന്നു. ഇതിന് പിന്നാലെ ജില്ലയിലെ വിനോദ സഞ്ചാര മേഖലയുമായി ബന്ധപ്പെട്ട് പ്രവർത്തിക്കുന്നവരുമായി ഹൗസ് ബോട്ടിലും രാഹുൽ ആശയവിനിമയം നടത്തി.
Discussion about this post