തിരുവനന്തപുരം: സംസ്ഥാന സ്കൂൾ കലോത്സവത്തിലെ പഴയിടം നമ്പൂതിരിയുടെ പാചകം സംബന്ധിച്ച് അനാവശ്യ വിവാദം ഉണ്ടാക്കിയ മാദ്ധ്യമ പ്രവർത്തകനെ രൂക്ഷമായി വിമർശിച്ച് സിനിമാ താരം ഷമ്മി തിലകൻ. യുവജനോത്സവാന്തകന് നടുവിരൽ നമസ്കാരം പറയുകയാണെന്ന് അദ്ദേഹം പറഞ്ഞു. ഫേസ്ബുക്കിലൂടെയായിരുന്നു ഷമ്മി തിലകന്റെ പ്രതികരണം.
കലോത്സവത്തിന് ഇനി പാചകം ചെയ്യാനില്ലെന്ന പഴയിടത്തിന്റെ പ്രഖ്യാപനം സംബന്ധിച്ച വാർത്തയ്ക്കൊപ്പമായിരുന്നു ഷമ്മി തിലകന്റെ വിമർശനം. കേട്ടത് സത്യമാണെങ്കിൽ
ആ യുവജനോത്സവാന്തകന് തന്റെ നടുവിരൽ നമസ്കാരം എന്നായിരുന്നു ഷമ്മി തിലകൻ പറഞ്ഞത്.
ഇത് #വസ്തുതയെങ്കിൽ..;
ആ യുവജനോത്സവാന്തകന്, വരുംതലമുറയുടെ ഘാതകന് നടുവിരൽ നമസ്കാരം..!- ഷമ്മി തിലകൻ ഫേസ്ബുക്കിൽ കുറിച്ചു.
കഴിഞ്ഞ ഏതാനും ദിവസങ്ങളായി മാദ്ധ്യമപ്രവർത്തകന്റെ സമൂഹമാദ്ധ്യമ പോസ്റ്റിൽ വിവാദം തുടരുകയാണ്. ഇതിനിടെയായിരുന്നു പഴയിടത്തിന്റെ അപ്രതീക്ഷിത പിൻവാങ്ങൽ പ്രഖ്യാപനം. കലോത്സവ വേദികളിലെ അടുക്കളയിൽ ഭക്ഷണം പാകം ചെയ്യാൻ തനിക്കിപ്പോൾ ഭയമാണെന്ന് ആയിരുന്നു പഴയിടം പ്രതികരിച്ചത്. ഭക്ഷണത്തിൽ പോലും ജാതിയുടെയും മതത്തിന്റെയും വിഷം കുത്തിനിറയ്ക്കുന്നു. ഇത് വലിയ അസ്വസ്ഥതയാണ് ഉണ്ടാക്കുന്നത്. ഭയം മൂലം അടുക്കളയിലെ ഭക്ഷണത്തിന് മുൻപിൽ കാവലിരിക്കേണ്ട സാഹചര്യംവരെയുണ്ടായെന്നും അദ്ദേഹം പറഞ്ഞു.
Discussion about this post