കൊച്ചി : ചിത്രങ്ങളും പോസ്റ്ററുകളുമായി ശബരിമലയിൽ ദർശനത്തിന് എത്തുന്നത് വിലക്കി ഹൈക്കോടതി. ചിത്രങ്ങളുമായി എത്തുന്നവരെ പതിനെട്ടാം പടി വഴി കടത്തിവിടരുത് എന്നാണ് നിർദ്ദേശം. സോപാനത്തിലും ദർശനം അനുവദിക്കരുത്. ദേവസ്വം ബോർഡ് ഇതിൽ നടപടിയെടുക്കണമെന്നും കോടതി അറിയിച്ചു.
താരങ്ങളുടെയും രാഷ്ട്രീയ നേതാക്കളുടെയും ചിത്രങ്ങളുമായി ശബരിമലയിൽ എത്തുന്നത് വർദ്ധിച്ചതോടെയാണ് കോടതി ഇടപെട്ടത്. ക്ഷേത്ര ദർശനത്തിനെത്തുന്ന ഭക്തർ ഡ്രം ഉൾപ്പെടെയുളള വാദ്യോപകരണങ്ങൾ ഉപയോഗിക്കരുതെന്നും കോടതി വ്യക്തമാക്കി.
ശബരിമല ദർശനത്തിനെത്തിയ ഭക്തൻ അയച്ച കത്തിന്റെ അടിസ്ഥാനത്തിലാണ് കോടതി സ്വമേധയാ കേസെടുത്തത്. ക്ഷേത്രത്തിലെത്തുന്ന ഭക്തർക്ക് ദർശനത്തിനുള്ള സൗകര്യം ഒരുക്കിക്കൊടുക്കണമെന്നും കോടതി വ്യക്തമാക്കി.
