കൊച്ചി: മലയാളത്തിൽ മെഗാ ഹിറ്റായി മുന്നേറുന്ന ഉണ്ണി മുകുന്ദന്റെ മാളികപ്പുറത്തിന് തമിഴ്നാട്ടിലും ആന്ധ്രാ പ്രദേശിലും തെലങ്കാനയിലും വൻ വരവേൽപ്പ്. തമിഴ്നാട്ടിലും ആന്ധ്രാ പ്രദേശിലും തെലങ്കാനയിലും ഹൗസ് ഫുൾ ഷോകളാണ് ചിത്രത്തിനുള്ളത്. കേരളത്തിൽ ചിത്രത്തിന് ലഭിച്ച വൻ സ്വീകാര്യതയും വിജയവും കൃത്യമായ മാർക്കറ്റിംഗിലൂടെ നേട്ടമാക്കി മാറ്റുകയാണ് അന്യഭാഷാ വിതരണക്കാരായ ട്രൈഡന്റ് ഫിലിംസും ഗീത ആർട്സും.
ചിത്രം തെലുങ്കിൽ വിതരണം ചെയ്യുന്നത് കാന്താരയും മഗധീരയും ഗജിനിയും ഉൾപ്പെടെയുള്ള മെഗാ ഹിറ്റുകൾ പ്രദർശനത്തിനെത്തിച്ച ഗീത ആർട്സാണ്. അല്ലു അരവിന്ദ് സ്ഥാപിച്ച ഗീത ആർട്സിന് നേതൃത്വം നൽകുന്നത് തെലുങ്ക് സൂപ്പർ തരാം അല്ലു അർജുനാണ്. രാക്ഷസൻ, വിക്രം വേദ തുടങ്ങിയ ചിത്രങ്ങൾ പ്രേക്ഷകരിലേക്ക് എത്തിച്ച ട്രൈഡന്റ് ഫിലിംസാണ് ചിത്രം തമിഴിൽ വിതരണം ചെയ്യുന്നത്.
അവധി ദിവസമായിരുന്ന വ്യാഴാഴ്ചയും കേരളത്തിൽ ഏറ്റവും കൂടുതൽ കളക്ഷൻ നേടിയ ചിത്രമായിരുന്നു മാളികപ്പുറം. ഒരു കോടിക്ക് മുകളിൽ ചിത്രം വ്യാഴാഴ്ചയും കളക്ട് ചെയ്തിട്ടുണ്ട്. മോഹൻലാലിന്റെ റിലീസ് ചിത്രമായ എലോൺ, മമ്മൂട്ടി- എൽജെപി ടീമിന്റെ നൻപകൽ നേരത്ത് മയക്കം എന്നീ ചിത്രങ്ങൾ വ്യാഴാഴ്ച നേടിയതിനേക്കാൾ കൂടുതൽ കളക്ഷനാണ് ഇരുപത്തിയെട്ടാം ദിവസവും മാളികപ്പുറം നേടിയിരിക്കുന്നത്.
Discussion about this post