കൊല്ലം: മുഖ്യമന്ത്രി പിണറായി വിജയനെ കരിങ്കൊടി കാണിച്ച് ബിജെപി. കൊല്ലത്ത് സംസ്ഥാന റവന്യൂദിനാഘോഷ പരിപാടിക്കും അവാർഡ് വിതരണത്തിനുമെത്തിയപ്പോഴായിരുന്നു പ്രവർത്തകരുടെ പ്രതിഷേധം.
പാരിപ്പള്ളിയിൽ മുഖ്യമന്ത്രിയുടെ വാഹനത്തിന് നേരെ പ്രവർത്തകർ കരിങ്കൊടി വീശുകയായിരുന്നു. ബിജെപി പരവൂർ മണ്ഡലം പ്രസിഡന്റ് പ്രദീപ് ജി, ജില്ലാ സോഷ്യൽ മീഡിയ കൺവീനർ വിഷ്ണു കുറുപ്പ്, യുവമോർച്ച മണ്ഡലം പ്രസിഡന്റ് പ്രവീൺ പാരിപ്പള്ളി, കുളത്തൂർകോണം വാർഡ് മെമ്പർ രഞ്ജിത്, കുളത്തൂർകോണം ബൂത്ത് കമ്മറ്റി അംഗം ഉണ്ണി എന്നിവരെ പോലീസ് അറസ്റ്റ് ചെയ്തു.
പിന്നീട് മുഖ്യമന്ത്രി പങ്കെടുക്കുന്ന വേദിയിലേക്കും യുവമോർച്ച കൊല്ലം ഘടകം പ്രതിഷേധ പ്രകടനം നടത്തി. ജില്ലാ പ്രസിഡന്റ് പ്രണവ് താമരക്കുളത്തിന്റെ നേതൃത്വത്തിൽ നടന്ന പ്രകടനത്തിൽ പങ്കെടുത്തവരെ പോലീസ് അറസ്റ്റ് ചെയ്തു നീക്കി.
നികുതിയിൽ കൂടി ജനങ്ങളെ കൊള്ളയടിക്കുന്ന പിണറായി രാജിവെക്കണമെന്ന് ആവശ്യപെട്ട് കറുപ്പ് വസ്ത്രവും കറുത്ത ബലൂണുകളും കൈയിലേന്തിയായിരുന്നു യുവമോർച്ചയുടെ പ്രതിഷേധ പ്രകടനം. ഗോപകുമാർ യു, മഹേഷ് മണികണ്ഠൻ തുടങ്ങിയവർ പങ്കെടുത്തു.
Discussion about this post