മെക്‌സിക്കോ സിറ്റി: മരിജുവാന വളര്‍ത്തുന്നതും മരിജുവാന വലിയ്ക്കുന്നതും സ്വാതന്ത്ര്യത്തിനുള്ള അവകാശത്തില്‍ പെടുമെന്ന് മെക്‌സിക്കന്‍ സുപ്രീംകോടതി. മരിജുവാന വലിയ്ക്കുന്നത് സ്വതന്ത്രമായ വ്യക്തിത്വവികസനത്തിനുള്ള മൗലികാവകാശത്തില്‍ ഉള്‍പ്പെടുമെന്ന വാദമാണ് ഒന്നിനെതിരെ നാല് വോട്ടിന് അഞ്ചംഗ ജുഡീഷ്യല്‍ പാനല്‍ ശരിവച്ചത്. എന്നാല്‍ മരിജുവാന വാണിജ്യാവശ്യത്തിന് ഉപയോഗിക്കാമെന്ന് കോടതി പറഞ്ഞിട്ടില്ല.
നിയമവിധേയമാക്കും എന്നും ഉത്തരവിലില്ല. എന്നാല്‍ അഞ്ച് ഹര്‍ജികളില്‍ കൂടി സമാനമായ വിധിവന്നാല്‍ ഉപയോഗം നിയമപരമാക്കാന്‍ കഴിയും. മരിജുവാന വളര്‍ത്താനും ഉപയോഗിക്കാനുമായി ക്ലബ് രൂപവത്കരിക്കണമെന്ന ആവശ്യവുമായി നാല് പേരാണ് കോടതിയെ സമീപിച്ചത്.
മരിജുവാന ഹാനികരമല്ലെന്ന് ആരും പറഞ്ഞിട്ടില്ല. ലഹരി പദാര്‍ത്ഥമായതിനാല്‍ തന്നെ അപകടകരമാണെന്നതും ശരിതന്നെ. എന്നാല്‍ സമ്പൂര്‍ണ്ണനിരോധനം പ്രയോഗികമല്ല പാനലിന്റെ ഭൂരിപക്ഷ അഭിപ്രായമറിയിച്ച് ജസ്റ്റിസ് അര്‍ത്തറോ സാല്‍വിദാര്‍ പറഞ്ഞു. അനുവാദമില്ലാതെ മറ്റുള്ളവരുടെ മുന്നില്‍ വച്ച് പുകവലിയ്ക്കുന്നതിനെ ഉത്തരവ് വിലക്കുന്നുണ്ട്. എന്നാല്‍ പൊതുജനങ്ങള്‍ക്ക് ശല്യമുണ്ടാകുന്നെന്ന് പരാതിയുയര്‍ന്നാല്‍ എന്ത് ചെയ്യുമെന്ന് വിധിയില്‍ വ്യക്തമാക്കുന്നില്ല.
കോടതി വിധി ബഹുമാനിക്കുന്നതായി ട്വീറ്റ് ചെയ്ത പ്രസിഡന്റ് എന്റിക്ക പെന നീറ്റോ, വിധിയുടെ സാദ്ധ്യതകളെക്കുറിച്ച് ജനങ്ങളില്‍ അവബോധമുണ്ടാക്കാന്‍ ഉദ്യോഗസ്ഥര്‍ക്ക് നിര്‍ദ്ദേശവും നല്‍കി. അമേരിക്കയിലെ വാഷിംഗ്ടണ്‍, കൊളറാഡോ, അലാസ്‌ക, ഓറിഗോണ്‍ എന്നീ സംസ്ഥാനങ്ങള്‍ മരിജുവാന ഉപയോഗം നിയമവിധേയമാക്കിയിട്ടുണ്ട്.
Discussion about this post