എറണാകുളം/ന്യൂഡൽഹി: ബ്രഹ്മപുരം മാലിന്യപ്ലാന്റിൽ തീ പിടിത്തമുണ്ടായ വിഷയത്തിൽ ഇടപെട്ട് കേന്ദ്രസർക്കാർ. സംഭവത്തിൽ വിശദമായ റിപ്പോർട്ട് സമർപ്പിക്കാൻ സർക്കാരിനോട് കേന്ദ്ര ആരോഗ്യമന്ത്രി മൻസുഖ് മാണ്ഡവ്യ നിർദ്ദേശം നൽകി. സംഭവത്തിൽ കേന്ദ്രം ഇടപെടണമെന്ന ആവശ്യം ജനങ്ങൾ ശക്തമായ സാഹചര്യത്തിലാണ് ആരോഗ്യമന്ത്രി റിപ്പോർട്ട് തേടിയിരിക്കുന്നത്.
ട്വിറ്ററിലൂടെ അദ്ദേഹം തന്നെയാണ് ഇക്കാര്യം അറിയിച്ചത്. ബ്രഹ്മപുരത്തെ ജനങ്ങളുടെ ആരോഗ്യ സുരക്ഷ ഉറപ്പാക്കാൻ സംസ്ഥാന സർക്കാരിന് എല്ലാവിധ സഹായങ്ങളും നൽകുമെന്നും അദ്ദേഹം വ്യക്തമാക്കി.
മാലിന്യപ്ലാന്റിലെ തീ അണയ്ക്കുന്നതിൽ സർക്കാർ അനാസ്ഥ തുടരുകയും, പൊതുജനം ബുദ്ധിമുട്ടുകയും ചെയ്ത സാഹചര്യത്തിൽ ബിജെപി സംസ്ഥാന അദ്ധ്യക്ഷൻ കെ. സുരേന്ദ്രൻ, കേന്ദ്ര സഹമന്ത്രി വി.മുരളീധരൻ എന്നിവരാണ് വിഷയത്തിൽ കേന്ദ്രം ഇടപെടണമെന്ന് ആവശ്യപ്പെട്ടത്. സംഭവത്തിൽ ഈ മാസം 10 ന് സുരേന്ദ്രൻ മൻസുഖ് മാണ്ഡവ്യയ്ക്ക് കത്ത് നൽകിയിരുന്നു. ഇതിന് പിന്നാലെ തിങ്കളാഴ്ച മൻസുഖ് മാണ്ഡവ്യയെ വി. മുരളീധരൻ നേരിൽ കാണുകയും, സ്ഥിതിഗതികൾ അറിയിക്കുകയും ചെയ്തിരുന്നു. ഇതിന് പിന്നാലെയായിരുന്നു സർക്കാരിനോട് റിപ്പോർട്ട് തേടിയത്.
Discussion about this post