വീട്ടില് വളര്ത്തുന്ന ഓമന മൃഗങ്ങള് യജമാനനെ കാണുമ്പോള് ഓടിയരികിലെത്തി സ്നേഹം പ്രകടിപ്പിക്കും. അവരൊന്ന് തലോടി, സ്നേഹിച്ചാലേ അവര്ക്ക് സന്തോഷമാകുകയുള്ളു. തന്റെ ഗമോറയും അതുപോലെ തന്നെയാണെന്നാണ് ജൊനാഥന് അറൈസ പറയുന്നത്. താന് കൊഞ്ചിക്കുന്നതും തന്നോടൊപ്പം കിടക്കയില് കിടക്കുന്നതുമൊക്കെ അവള്ക്ക് വളരെ ഇഷ്ടമാണ്. പക്ഷേ ഗമോറ നിങ്ങള് കരുതുന്നത് പോലെ പട്ടിയോ, പൂച്ചയോ ഒന്നുമല്ല. ഒരു മുതലയാണ്!
ഒരു വളര്ത്തുപട്ടിയുടെ അതേപോലെയാണ് ഗമോറയെന്ന തന്റെ മുതല പെരുമാറുന്നതെന്ന് ജൊനാഥന് പറയുന്നു. അതുകൊണ്ടുതന്നെ വളര്ത്തുപട്ടികള്ക്ക് നല്കുന്ന എല്ലാ സ്വാതന്ത്ര്യവും ഗമോറയ്ക്കുണ്ട്. ജൊനാഥന്റെ വീട്ടിലെവിടെയും അവള് ചുറ്റിനടക്കും. കസേരയിലും തന്റെ കിടക്കയിലുമൊക്കെയാണ് ഗമോറയുടെ ഇരുത്തവും കിടത്തവുമെല്ലാമെന്ന് ജൊനാഥന് പറയുന്നു. മാത്രമല്ല, ഗമോറയ്ക്ക് പടികള് കയറാനും കഴിയും. വേണ്ടപ്പോള് തന്റെ കുളത്തില് പോയി കിടന്നും അല്ലാത്തപ്പോള് വീട്ടിനുള്ളില് വിശ്രമിച്ചുമെല്ലാം ഗമോറ സമയം ചിലവഴിക്കുമെന്ന് മെക്സികോയിലെ സാന് ലൂയിസ് സ്വദേശിയായ ജൊനാഥനെ ഉദ്ധരിച്ച് മിറര് ഓണ്ലൈന് റിപ്പോര്ട്ട് ചെയ്യുന്നു.
ഒരു മുതല മനുഷ്യരുമായി അടുക്കുകയും ഗമോറയെ പോലെ വളര്ത്തുമൃഗമായി മാറുകയും ചെയ്ത വളരെ അപൂര്വ്വം സംഭവങ്ങള് മാത്രമേ ഉള്ളൂവെന്ന് ജൊനാഥന് പറയുന്നു. മുതലകളുടെ കൂട്ടത്തില് വളരെ അപൂര്വ്വമാണ് ഗമോറ. അവളെ എടുത്തുനടക്കാനും വളരെ അടുക്കാനും ഒക്കെ പറ്റുമെന്ന് ജൊനാഥന് വ്യക്തമാക്കി. മനുഷ്യസാന്നിധ്യത്തില് ഒരു മുതല പേടിക്കുകയും ദേഷ്യം പിടിക്കാതിരിക്കുകയും ചെയ്യുന്നത് ആശ്ചര്യകരമാണ്.
സൂപ്പര്ഹീറോ സിനിമയായ ഗാര്ഡിയന്സ് ഓഫ് ഗാലക്സിയിലെ കഥാപാത്രത്തിന്റെ പേരാണ് ജൊനാഥന് ഗമോറയ്ക്ക് നല്കിയിരിക്കുന്നത്. ഈ മുതലയെ കൊണ്ടുവരുമ്പോള് അവള് വളരെ ചെറുതായിരുന്നുവെന്നും പച്ചനിറത്തില് ആക്രമണകാരിയായിരുന്നുവെന്നും ജൊനാഥന് പറഞ്ഞു. ആക്രമിക്കുകയെന്നത് അവളുടെ വര്ഗ്ഗസ്വഭാവമാണെങ്കിലും ഇപ്പോള് ഫോട്ടോഷൂട്ടിലും വീഡിയോ ഷൂട്ടിലും മോഡലായി പങ്കെടുക്കുന്ന രീതിയിലേക്ക് അവളുടെ സ്വഭാവം മാറി.
ഗമോറയ്ക്ക് അനുയോജ്യമായ അന്തരീക്ഷം വീട്ടില് ഒരുക്കുന്നതിന് ജൊനാഥന് ഇടയ്ക്കിടയ്ക്ക് വീട്ടിനുള്ളിലെ താപനില ക്രമീകരിക്കേണ്ടിവരാറുണ്ട്. രാവിലെ എഴുന്നേറ്റാല് ആദ്യം തന്നെ ഡിജിറ്റല് തെര്മോസ്റ്റാറ്റില് താപനില പരിശോധിച്ച് ഗമോറയ്ക്ക പറ്റിയ അവസ്ഥയാണെന്ന് ഉറപ്പുവരുത്തും. പിന്നീട് കുളം വൃത്തിയാക്കുന്ന ജോലിയാണ്. അതിനുശേഷം ഭക്ഷണസമയമാണ്. സാധാരണയായി ഗമോറയ്ക്ക് വേണ്ടി പതിനഞ്ച് ദിവസത്തേക്കുള്ള ഭക്ഷണം ഒരുമിച്ച് ഉണ്ടാക്കി ശിതീകരിച്ച് വെക്കുകയാണെന്നും ഓരോ ദിവസവും അതെടുത്ത് തണുപ്പ് മാറ്റി കൊടുക്കുമെന്നും ജൊനാഥന് പറയുന്നു. മുയല്, എലി, പോത്തിറച്ചി, കോഴിയിറച്ചി പോലുള്ളവയാണ് ഗമോറയുടെ ഭക്ഷണങ്ങള്.
ഗമോറയെ കൂടാതെ രണ്ട് വളര്ത്തുപട്ടികളും ആമകളും ജൊനാഥനുണ്ട്.
Discussion about this post