ന്യൂഡൽഹി : എംപി സ്ഥാനത്ത് നിന്ന് അയോഗ്യനാക്കപ്പെട്ടതിന് പിന്നാലെ രാഹുൽ ഗാന്ധിയോട് ഔദ്യോഗിക വസതി ഒഴിയാൻ ആവശ്യപ്പെട്ടുകൊണ്ട് നോട്ടീസ് അയച്ചിരുന്നു. ഈ സംഭവത്തിൽ പ്രതികരിച്ച് രാഹുലിന് സ്വന്തം വീട് നൽകാമെന്ന് അറിയിച്ചുകൊണ്ട് രംഗത്തെത്തിയിരിക്കുകയാണ് പാർട്ടി അദ്ധ്യക്ഷൻ മല്ലികാർജുൻ ഖാർഗെ. രാഹുലിന് അമ്മയോടൊപ്പം പോയി താമസിക്കാമെന്നും അതല്ലെങ്കിൽ താൻ വീട് ഒഴിഞ്ഞുകൊടുക്കാമെന്നും ഖാർഗെ പറഞ്ഞു.
മൂന്ന്-നാല് മാസത്തോളം വീടില്ലാതെ കഴിയേണ്ടി വന്ന സാഹചര്യം ജനാധിപത്യത്തിൽ ഉണ്ടായിട്ടുണ്ട്. തനിക്ക് ഇപ്പോൾ കിട്ടിയിരിക്കുന്ന വസതി ലഭിച്ചത് ആറ് മാസങ്ങൾക്ക് ശേഷമാണ്. രാഹുലിനോട് ഇപ്പോൾ വസതി ഒഴിയാൻ ആവശ്യപ്പെട്ടിരിക്കുന്നത് അപമാനിക്കാൻ വേണ്ടിയാണെന്നാണ് ഖാർഗെയുടെ വാദം. ഈ മനോഭാവത്തെ അപലപിക്കുന്നുവെന്നും ഖാർഗെ വ്യക്തമാക്കി.
രാഹുലിനെ തളർത്താൻ അവർ എല്ലാ ശ്രമങ്ങളും നടത്തും. ഇനി രാഹുലിന് അമ്മ സോണിയ ഗാന്ധിയോടൊപ്പം കഴിയാം. ഇല്ലെങ്കിൽ സ്വന്തം വസതി ഒഴിഞ്ഞുകൊടുക്കാനും തയ്യാറാണെന്ന് ഖാർഗെ പറഞ്ഞു.
അയോഗ്യനാക്കപ്പെട്ടതിന് പിന്നാലെയാണ് വസതി ഒഴിയാൻ ആവശ്യപ്പെട്ടുകൊണ്ട് രാഹുലിന് കത്തയച്ചത്. അതേസമയം താൻ ഉടൻ വസതി ഒഴിയുമെന്ന് രാഹുൽ അറിയിച്ചിട്ടുണ്ട്.
Discussion about this post