മൈക്രോബ്ലോഗിംഗ് സൈറ്റായ ട്വിറ്റർ ഏറ്റെടുത്തത് മുതൽ തുടങ്ങിയതാണ് ഇലോൺ മസ്കിന്റെ ട്വിറ്റർ പരിഷ്കാരങ്ങളും പരീക്ഷണങ്ങളും. ഏറ്റവുമൊടുവിലത്തെ കമ്പനി ലോഗോ ആയ നീലക്കിളിയെ മറ്റി ഡോജെയെ കൊണ്ടുവന്നതും പിന്നാലെ ആ തീരുമാനം തിരുത്തുകയും ചെയ്തതടക്കം മസ്കിന്റെ പരിഷ്കാരങ്ങളെല്ലാം വിവാദങ്ങൾക്കും ചർച്ചകൾക്കും തുടക്കമിട്ടവയായിരുന്നു. Twitter-ലെ ‘W’ മാറ്റാൻ മസ്ക് ഒരു ശ്രമം നടത്തുന്നുണ്ടോ എന്നാണ് പുതിയ സംശയം. സംശയത്തിന് കാരണം വേറൊന്നുമല്ല, സാൻഫ്രാൻസിസ്കോയിലെ കമ്പനി ആസ്ഥാനത്തിന് പുറത്തുള്ള ട്വിറ്റർ ചിഹ്നത്തിലെ W എന്ന അക്ഷരം മറച്ചുവെച്ചിരിക്കുകയാണ് ട്വിറ്റർ മേധാവിയായി മസ്ക്.
മാറ്റം വരുത്തിയ ട്വിറ്റർ ചിഹ്നത്തിന്റെ ഫോട്ടോ പങ്കുവെച്ചുകൊണ്ട് മസ്ക് തന്നെയാണ് ഇക്കാര്യം ട്വീറ്റ് ചെയ്തത്. ട്വിറ്റർ ചിഹ്നം നിയമപരമായി അങ്ങനെ തന്നെ നിലനിർത്തണമെന്നും W മാറ്റാൻ സാധിക്കില്ലെന്നുമാണ് സാൻഫ്രാൻസിസ്കോ ആസ്ഥാനത്തെ തങ്ങളുടെ സ്ഥല ഉടമ പറയുന്നതെന്നും അതുകൊണ്ട് ചിഹ്നത്തിന്റെ പശ്ചാത്തലം ചായം പൂശി പ്രശ്നം പരിഹരിച്ചുവെന്നും മസ്ക് തമാശരൂപത്തിൽ മസ്ക് വ്യക്തമാക്കി. ഞങ്ങളുടെ ടിറ്ററിനെ അവർ അടിച്ചമർത്താൻ ശ്രമിച്ചുവെന്ന് പിന്നീട് വീണ്ടും മസ്ക് ട്വീറ്റ് ചെയ്തു.
Our landlord at SF HQ says we’re legally required to keep sign as Twitter & cannot remove “w”, so we painted it background color. Problem solved! pic.twitter.com/1iFjccTbUq
— Elon Musk (@elonmusk) April 10, 2023
ട്വിറ്ററിലെ W മറച്ചുവെച്ചിട്ടുള്ള ചില ഫോട്ടോകൾ കഴിഞ്ഞിടെ ട്വിറ്റർ ഉപയോക്താക്കൾ ഇന്റെർനെറ്റിൽ പങ്കുവെച്ചിരുന്നു. ട്വിറ്റർ എന്ന പേരിൽ മാറ്റം വന്നേക്കുമെന്ന് മസ്ക് സൂചന നൽകുന്നത് ഇതാദ്യമായല്ല. കഴിഞ്ഞ വർഷം ഏപ്രിലിൽ പേരിൽ നിന്നും W മാറ്റുന്നതിനെ കുറിച്ച് ഉപയോക്താക്കളുടെ അഭിപ്രായം തേടി മസ്ക് ഉപയോക്താക്കൾക്കിടയിൽ വോട്ടെടുപ്പ് നടത്തിയിരുന്നു. പക്ഷേ, മാറ്റാം, തീർച്ചയായും മാറ്റാം എന്നീ അഭിപ്രായങ്ങൾ മാത്രമേ ഉപയോക്താക്കൾക്ക് രേഖപ്പെടുത്താൻ അവസരമുണ്ടായിരുന്നുള്ളു. എന്തായാലും കമ്പനിയുടെ പേരിൽ നിന്നും W മാറ്റാനുള്ള ശ്രമത്തി നെതിരെ സമ്മിശ്ര പ്രതികരണമാണ് ഉപയോക്താക്കളിൽ നിന്നും ഉയരുന്നത്.
കഴിഞ്ഞ ആഴ്ചയാണ് ട്വിറ്ററിന്റെ മുഖമുദ്രയായിരുന്ന നീലക്കിളിയെ മാറ്റി മസ്ക് ഡോജെ എന്ന ഇന്റെർനെറ്റ് മീമിനെ പ്രതിഷ്ഠിച്ചത്. എന്നാൽ തൊട്ടുപിന്നാലെ തന്നെ കമ്പനി ആ തീരുമാനം തിരുത്തുകയും ചെയ്തു.
