നാളെ വിഷു. സമ്പല്സമൃദ്ധമായ പുതുവര്ഷത്തെ കണികണ്ടുണരാന് കാത്തിരിക്കുകയാണ് മലയാളികള്. വരാനിരിക്കുന്ന നാളുകള് ഐശ്വര്യത്തിന്റേതും സമ്പല്സമൃദ്ധിയുടേതുമാകുകയെന്ന സങ്കല്പ്പത്തോടെയാണ് വിഷുവിന് കണികാണുന്നത്. കേരളത്തിന്റെ പല ഭാഗങ്ങളില് വിഷുക്കണി ഒരുക്കുന്നതില് വ്യത്യാസങ്ങളുണ്ടെങ്കിലും വിഷുക്കണിയില് ഒഴിച്ചുകൂടാന് പാടില്ലാത്ത ചിലതുണ്ട്. മാത്രമല്ല വിഷുക്കണി തയ്യാറാക്കുന്നതില് ചില ചിട്ടകളുമുണ്ട്.
വിഷുവിന് ഉറക്കമുണരേണ്ടത് കണി കണ്ടുകൊണ്ടാകണം. ആ കാഴ്ച കണ്ണും മനസ്സും നിറയ്ക്കുന്നതാകണം. കൃഷ്ണവിഗ്രഹത്തിന് മുമ്പിലാണ് വിഷുക്കണി തയ്യാറാക്കേണ്ടത്. ഓട്ടുരുളിയിലാണ് ഫലവര്ഗ്ഗങ്ങളും ധാന്യങ്ങളുമെല്ലാം വയ്ക്കേണ്ടത്. കണി വയ്ക്കുന്നതിനുള്ള ഓട്ടുരുളിയും നിലവിളക്കും വാല്ക്കിണ്ടിയുമെല്ലാം തേച്ചുകഴുകിയതാകണം.
ഉണക്കലരി, നാളികേരം, കണിവെള്ളരി, കണിക്കൊന്ന, ചക്ക, മാങ്ങ, കദളിപ്പഴം മറ്റ് ഫലവര്ഗ്ഗങ്ങള് എന്നിവ ഉരുളിയില് ഒരുക്കണം. ഇതിനിടയില് വാല്ക്കണ്ണാടിയും വെക്കണം. ഭഗവതിയുടെ പ്രതീകമായാണ് വിഷുക്കണിയില് വാല്ക്കണ്ണാടി വെക്കുന്നതെന്ന് പറയപ്പെടുന്നു. അതുമാത്രമല്ല, കണികാണുന്നവര് സ്വന്തം മുഖം കൂടി കണിക്കൊപ്പം കാണുകയെന്ന സങ്കല്പ്പവും വാല്ക്കണ്ണാടി വെയ്ക്കുന്നതിലുണ്ട്. മറ്റൊരു താലത്തില് കോടിമുണ്ട്, വെറ്റില, അടയ്ക്ക, നാണയത്തുട്ട്, കുങ്കുമം, കണ്മഷി, ഗ്രന്ഥം, സ്വര്ണ്ണം എന്നിവ വയ്ക്കണം. തൊട്ടടുത്തായി ഓട്ടുകിണ്ടിയില് വെള്ളം നിറച്ച് വെക്കണം. ഇതിന് മുമ്പിലായി നിലവിളക്ക് കത്തിച്ചുവെക്കണം. നിലവളിക്കിന്റെ പ്രകാശം മൂലം മുമ്പില് വെച്ചിരിക്കുന്നവയുടെ നിഴല് കൃഷ്ണവിഗ്രഹത്തില് വീഴാത്ത രീതിയില് വേണം വിളക്ക് കത്തിച്ചുവെക്കാന്.
സാധാരണയായി കുടുംബത്തിലെ മുതിര്ന്ന സ്ത്രീയാണ് വിഷുക്കണി തയ്യാറാക്കുക. തലേദിവസം തന്നെ വിഷുക്കണി ഒരുക്കിവെച്ച്, വിഷുവിന് കുളിച്ച് വിളക്ക് കത്തിച്ച് ഇവരാകും ആദ്യം കണി കാണുക. പിന്നീട് കുടുംബാഗങ്ങളെ ഓരോരുത്തരെ ആയി കണ്ണുപൊത്തി കണിയുടെ മുമ്പിലെത്തിച്ച് കണികാണിക്കുന്നു.
കൈനീട്ടം
വിഷുക്കണി പോലെ തന്നെ പ്രധാനമാണ് വിഷുക്കൈനീട്ടവും. മുതിര്ന്നവരുടെ കയ്യില് നിന്ന് കൈനീട്ടം കിട്ടുമെന്നതിനാല് വിഷു കുട്ടികളുടെ പ്രിയപ്പെട്ട ഉത്സവം കൂടിയാണ്. വിഷുക്കണി പോലെ തന്നെ വരുംനാളുകളിലെ സമ്പല്സമൃദ്ധി തന്നെയാണ് വിഷുക്കൈനീട്ടത്തിലൂടെയും അര്ത്ഥമാക്കുന്നത്. നാണയത്തുട്ടുകളായിരുന്നു പണ്ടുകാലങ്ങളില് കൈനീട്ടമായി നല്കിയിരിക്കുന്നത്.
Discussion about this post