തൊഴിലാളി ദിനമാണ് കഴിഞ്ഞുപോയത്. തൊഴിലാളികളുടെ അവകാശങ്ങളും തൊഴിലിടത്തെ അനീതിയുമെല്ലാം ചര്ച്ച ചെയ്യപ്പെടാനുള്ള ദിനം. അപ്പോഴിതാ, തൊഴിലിടത്തെ അങ്ങേയറ്റം അരക്ഷിതാവസ്ഥയില് തളച്ചിടുന്ന ഒരു ബോസിന്റെ മെമോ സോഷ്യല് മീഡിയയില് ചര്ച്ചയാകുന്നു. തൊഴിലിടത്തില് ഒരു തമാശയും വേണ്ടെന്ന പുതിയ തൊഴില് നയം ആവശ്യപ്പെട്ട് ജീവനക്കാര്ക്ക് ഒരു ബോസ് അയച്ച തീര്ത്തും അസുഖകരമായ ഒരു കുറിപ്പ് അതേ കമ്പനിയിലെ ജീവനക്കാരന് തന്നെയാണ് റെഡ്ഡിറ്റില് പങ്കുവെച്ചത്. ഒരു ചെറിയ കഷ്ണം കടലാസില് പ്രിന്റ് ചെയ്ത ഈ കുറിപ്പ് സോഷ്യല് മീഡിയയില് വൈറലായിരിക്കുകയാണ്. ഇത്രയും മോശം തൊഴില് സംസ്കാരത്തിന് അഹ്വാനം ചെയ്യുന്ന ഈ ബോസ് ശരിക്കും ‘വിഷ’മാണെന്നാണ് സോഷ്യല് മീഡിയയില് ഉയരുന്ന അഭിപ്രായം.
ഇതാണ് കുറിപ്പ്!
‘ജീവക്കാരുടെ ശ്രദ്ധയ്ക്ക് (കമ്പനിയുടെ പേര് മറച്ചിട്ടുണ്ട്). ജോലി തമാശയല്ല. നിങ്ങളുടെ തൊഴിലാണത്. ജോലി സമയത്ത്, ജോലിയുമായി ബന്ധമില്ലാത്ത കാര്യങ്ങള് ചര്ച്ച ചെയ്യരുത്. ജോലിസമയം സൗഹൃദങ്ങള്ക്കായി വിനിയോഗിക്കരുത്. ജോലി തീര്ന്നതിന് ശേഷം ഫോണ് നമ്പര് കൈമാറുകയോ പുറത്ത് കറങ്ങാന് പോകുകയോ ചെയ്യുക. സഹപ്രവര്ത്തകന് കമ്പനി സമയത്ത് ജോലിയുമായി ബന്ധമില്ലാത്ത കാര്യങ്ങള് ചര്ച്ച ചെയ്താല് എന്നെ (പേര് മായ്ച്ചിട്ടുണ്ട്) അറിയിക്കുക. തൊഴിലിടം ഡേകെയറല്ല’.
കുറിപ്പിനെതിരെ സോഷ്യല് മീഡിയ ഉപയോക്താക്കള് അങ്ങേയറ്റം രോഷം പ്രകടിപ്പിച്ചുള്ള കമന്റുകളാണ് രേഖപ്പെടുത്തിയിരിക്കുന്നത്. ജീവനക്കാര് തൊഴില് ആസ്വദിച്ച് ചെയ്തെങ്കില് മാത്രമേ ഉല്പ്പാദനക്ഷത ഉയരുകയുള്ളുവെന്നും മറ്റുമുള്ള നിരവധി അഭിപ്രായങ്ങളാണ് ആളുകള് പങ്കുവെച്ചിരിക്കുന്നത്.
Discussion about this post