മുംബൈ: എയർ ഇന്ത്യ വിമാനത്തിൽ യാത്രക്കാരിയെ തേൾ കുത്തി. നാഗ്പൂരിൽ നിന്നും മുംബൈയിലേക്ക് പോയ എയർ ഇന്ത്യ വിമാനത്തിലായിരുന്നു സംഭവം. യാത്രക്കാരി അപകടനില തരണം ചെയ്തതായി എയർ ഇന്ത്യ അറിയിച്ചു.
കഴിഞ്ഞ മാസം 23നായിരുന്നു സംഭവം എന്നാണ് അധികൃതർ നൽകുന്ന വിവരം. നാഗ്പൂരിൽ നിന്നും പുറപ്പെട്ട എഐ 630 വിമാനത്തിൽവച്ചായിരുന്നു യാത്രക്കാരിയ്ക്ക് തേളിന്റെ കുത്തേറ്റത്. ഇവർ വിവരമറിയിച്ചതിനെ തുടർന്ന് വിമാനത്തിൽവച്ച് ഇവർക്ക് അടിയന്തിര വൈദ്യസഹായം നൽകി. വിമാനം മുംബൈയിൽ എത്തിയ ഉടൻ തന്നെ ഇവരെ ആശുപത്രിയിൽ പ്രവേശിപ്പിക്കുകയും ചെയ്തു. കൃത്യസമയത്ത് ആവശ്യമായ പ്രാഥമിക ചികിത്സ നൽകിയതിനാൽ ഇവരുടെ ആരോഗ്യനില ഗുരുതരമായില്ല.
തീർത്തും അപ്രതീക്ഷിതമായ സംഭവം ആയിരുന്നു വിമാനത്തിൽവച്ചുണ്ടായതെന്ന് എയർ ഇന്ത്യ വക്താവ് പറഞ്ഞു. ആദ്യമായാണ് വിമാനത്തിനുള്ളിൽവച്ച് ഇത്തരമൊരു അപകടം ഉണ്ടാകുന്നത്. വിമാനം ഇറങ്ങിയപ്പോൾ തന്നെ ഡോക്ടർ എത്തി യാത്രക്കാരിയ്ക്ക് ചികിത്സ നൽകിയിരുന്നു. ചികിത്സയ്ക്ക് ശേഷം അവർ ആശുപത്രിവിട്ടു. ഇപ്പോൾ സുഖമായിരിക്കുന്നു. സംഭവത്തിന് തൊട്ട് പിന്നാലെ തന്നെ എയർ ഇന്ത്യ എൻജിനീയറിംഗ് ടീം വിമാനത്തിൽ പരിശോധന നടത്തി. യാത്രക്കാരിയ്ക്ക് ഉണ്ടായ ബുദ്ധിമുട്ടിൽ മാപ്പ് ചോദിക്കുന്നുവെന്നും വക്താവ് വ്യക്തമാക്കി.
