യശസ്സുയർത്തി യശസ്വി ; കണ്ണഞ്ചിപ്പിക്കുന്ന ജയവുമായി രാജസ്ഥാൻ റോയൽസ്

കൊൽക്കത്ത : ഈഡൻ ഗാർഡൻസിൽ വെള്ളിടിയായി മാറിയ യശസ്വി ജെയ്സ്വാളിന്റെ തകർപ്പൻ ബാറ്റിംഗ് മികവിൽ രാജസ്ഥാൻ റോയൽസിന്‌ കണ്ണഞ്ചിപ്പിക്കുന്ന ജയം. കൊൽക്കത്ത നൈറ്റ് റൈഡേഴ്സിനെ 9 വിക്കറ്റിനാണ് റോയൽസ് തകർത്തത്. കൊൽക്കത്ത ഉയർത്തിയ 150 റൺസ് വിജയ ലക്ഷ്യം പതിനാലാം ഓവറിൽ റോയൽസ് മറികടന്നു.

പതിമൂന്ന് പന്തിൽ അർദ്ധ സെഞ്ച്വറി തികച്ച യശസ്വി ജെയ്സ്‌വാളിന്റെ ഉജ്ജ്വല ബാറ്റിംഗാണ് രാജസ്ഥാന് അനായാസ ജയം സമ്മാനിച്ചത്. 47 പന്തിൽ 98 റൺസുമായി യശസ്വിയും 29 പന്തിൽ 48 റൺസുമായി ക്യാപ്ടൻ സഞ്ജു സാംസണും പുറത്താകാതെ നിന്നു. യശസ്വി 12 ബൗണ്ടറികളും അഞ്ച് സിക്സറുകളും പറത്തിയപ്പോൾ സഞ്ജു 2 ബൗണ്ടറികളും അഞ്ച് സിക്സറുകളുമാണ് നേടിയത്. നിതീഷ് റാണ എറിഞ്ഞ ആദ്യ ഓവറിൽ യശസ്വി 26 റൺസാണ് അടിച്ച് കൂട്ടിയത്.

നേരത്തെ ആദ്യം ബാറ്റ് ചെയ്ത കൊൽക്കത്ത വെങ്കിടേഷ് അയ്യരുടെ അർദ്ധ സെഞ്ച്വറി കരുത്തിലാണ് 8 വിക്കറ്റിന് 149 റൺസ് നേടിയത്. നിതീഷ് റാണ 22 റൺസ് നേടി. രാജസ്ഥാനു വേണ്ടി യുസ്‌വേന്ദ്ര ചാഹൽ 25 റൺസിന് നാല് വിക്കറ്റുകൾ വീഴ്ത്തി.

12 കളികളിൽ നിന്ന് 12 പോയിന്റ് നേടി രാജസ്ഥാൻ റോയൽസ് നിലവിൽ മൂന്നാം സ്ഥാനത്താണ്. 11 കളികളിൽ 12 പോയിന്റുകൾ നേടിയ മുംബൈയാണ് നാലാം സ്ഥാനത്ത്. ഗുജറാത്ത് ടൈറ്റൻസും ചെന്നൈ സൂപ്പർ കിംഗ്സും പട്ടികയിൽ ഒന്നും രണ്ടും സ്ഥാനങ്ങളിലാണ്.