തിരുവനന്തപുരം: സിനിമാ രംഗത്തെ ലഹരി ഉപയോഗം സംബന്ധിച്ച് നടത്തിയ വെളിപ്പെടുത്തലിൽ ഉണ്ടാകുന്ന സൈബർ ആക്രമണങ്ങളോട് പ്രതികരിച്ച് നടൻ ടിനി ടോം. ലഹരി ഉപയോഗിച്ച് പല്ല് പൊടിഞ്ഞ നടൻ വരെയുണ്ടെന്ന ടിനി ടോമിന്റെ വെളിപ്പടുത്തലാണ് വലിയ വിവാദങ്ങൾക്ക് കാരണമായത്. ഇതിന് പിന്നാലെ നിരവധി പേർ നടന്റെ പേര് വെളിപ്പെടുത്താൻ അദ്ദേഹത്തോട് ആവശ്യപ്പെട്ടിരുന്നു. ഇതിനോട് പ്രതികരിച്ചാണ് അദ്ദേഹം ഇപ്പോൾ രംഗത്ത് വന്നിരിക്കുന്നത്.
പല്ല് പൊടിഞ്ഞ നടൻ ആരാണെന്ന് അറിയണമെങ്കിൽ നിങ്ങളുടെ നമ്പർ തനിക്ക് ഇൻബോക്സ് ചെയ്യണമെന്നാണ് ടിനി ടോം ആവശ്യപ്പെട്ടിരിക്കുന്നത്. നിങ്ങളുടെ നമ്പർ ഇൻബോക്സിൽ അയക്കൂ. അത് താൻ എക്സൈസിന് നൽകാം. അവർ നിങ്ങൾക്ക് നടന്റെ പേര് പറഞ്ഞ് നൽകുമെന്നായിരുന്നു ടിനി ടോമിന്റെ പ്രതികരണം. സൈബർ ആക്രമണങ്ങൾക്കിടെ ടിനി ടോമിനെ പിന്തുണച്ച് എംഎൽഎ ഉമ തോമസ് രംഗത്ത് വരികയും എംഎൽഎയുടെ ഫേസ്ബുക്ക് പോസ്റ്റ് അദ്ദേഹം പങ്കുവയ്ക്കുകയും ചെയ്തിരുന്നു. ഇതിന് താഴെ വന്ന കമന്റിനോട് ആയിരുന്നു അദ്ദേഹത്തിന്റെ പ്രതികരണം.
കേരള സർവ്വകലാശാല കലോത്സവത്തിന്റെ ഉദ്ഘാടന വേദിയിൽ സംസാരിക്കുന്നതിനിടെയായിരുന്നു സിനിമ മേഖലയിലെ ലഹരി ഉപയോഗം സംബന്ധിച്ചുള്ള ടിനി ടോമിന്റെ വെളിപ്പെടുത്തൽ. തന്റെ മകന് ഒരു പ്രമുഖ നടന്റെ മകനായി അഭിനയിക്കാൻ അവസരം ലഭിച്ചിരുന്നു. എന്നാൽ ലഹരി ഉപയോഗത്തെക്കുറിച്ചുള്ള ഭാര്യയുടെ പേരി കാരണം ഇതിന് വിസമ്മതിക്കുകയായിരുന്നു. ലഹരി ഉപയോഗിച്ച് പല്ല് പൊടിഞ്ഞു പോയ നടനെ തനിക്ക് അറിയാമെന്നും ടിനി ടോം പറഞ്ഞിരുന്നു.
എന്നാൽ ഇതിന് പിന്നാലെ രൂക്ഷമായ വിമർശനം ആയിരുന്നു അദ്ദേഹത്തിന് നേരെ ഉണ്ടായത്. സിനിമാ മേഖലയിൽ നിന്നുള്ളവർ തന്നെ ഇതിനെതിരെ രംഗത്ത് വന്നിരുന്നു.
Discussion about this post