വടശേരിക്കര: നിർധന കുടുംബങ്ങൾക്ക് വീട് നിർമിക്കാനായി സേവാഭാരതിക്ക് 80 സെന്റ് സ്ഥലം ദാനം നൽകി ഗൃഹനാഥൻ. വടശേരിക്കര ഇടക്കുളം പള്ളിക്കമുരുപ്പ് ആതിരയിൽ വീട്ടിൽ കെ.കെ പ്രസാദ് എന്ന തമ്പി ചേട്ടൻ ആണ് സമാനതകളില്ലാത്ത സേവന മനസിലൂടെ നാട്ടുകാരുടെ ഹൃദയം കവർന്നത്.
സീതത്തോട്ടിൽ സ്വന്തം പേരിലുളള ഭൂമിയാണ് ഇദ്ദേഹം കൈമാറുക. 15 നിർധന കുടുംബങ്ങൾക്കാണ് ഈ ഭൂമിയിൽ വീട് ഒരുങ്ങുക. ഭൂമിയുടെ കൈമാറ്റവും രജിസ്ട്രേഷൻ നടപടികളും പൂർത്തിയായാൽ തുടർ നടപടികൾ ആരംഭിക്കും. തടി ബിസിനസും ഫർണിച്ചർ ബിസനസും നടത്തുന്ന ആളാണ് തമ്പിച്ചേട്ടൻ എന്ന് നാട്ടുകാർ വിളിക്കുന്ന കെകെ പ്രസാദ്.
സേവാഭാരതിയുടെ വടശേരിക്കര, സീതത്തോട് യൂണിറ്റുകൾ ചേർന്നാകും ഭൂമിയിൽ അർഹരായവർക്ക് വീട് നിർമിക്കുന്നതിനുളള തുടർ നടപടികൾ സ്വീകരിക്കുക.
ശബരിമല -മണ്ഡല കാലത്ത് ഉൾപ്പെടെ ശ്രദ്ധേയമായ സേവനമാണ് സേവാഭാരതിയുടെ വടശേരിക്കര യൂണിറ്റ് നടത്തുന്നത്. ശബരിമല തീർത്ഥാടകരുടെ പ്രധാന ഇടത്താവളങ്ങളിൽ ഒന്നാണ് വടശേരിക്കര. അതുകൊണ്ടു തന്നെ മണ്ഡലകാലത്തെ ആംബുലൻസ് സേവനവും ശുചീകരണവും അന്നദാനവും അടക്കമുളള പ്രവർത്തനങ്ങൾ സേവാഭാരതിക്ക് നേരത്തെ തന്നെ ഈ മേഖലയിൽ ഏറെ പ്രശംസ നേടിക്കൊടുത്തിട്ടുണ്ട്.
സൗജന്യ നേത്രപരിശോധനാ ക്യാമ്പും തിമിര ശസ്ത്രക്രിയയും ലഹരി ഉപയോഗത്തിനെതിരെ കുട്ടികളെ പങ്കെടുപ്പിച്ചുകൊണ്ടുളള പരിപാടികളും പതിവായി വടശേരിക്കര യൂണിറ്റ് സംഘടിപ്പിക്കാറുണ്ട്. സേവാഭാരതി വടശ്ശേരിക്കര, പെരുനാട് യൂണിറ്റുകളിൽ ആരംഭിക്കുന്ന സ്വയംതൊഴിൽ സംരംഭവും തയ്യൽ പരിശീലന കേന്ദ്രവും ഈ മാസം 27 ന് ഹിന്ദു ഐക്യവേദി സംസ്ഥാന വർക്കിംഗ് പ്രസിഡണ്ട് വത്സൻ തില്ലങ്കേരി ഉദ്ഘാടനം ചെയ്യാനിരിക്കെയാണ് സേവന വഴിയിലെ അടുത്ത ദൗത്യവും വടശേരിക്കര യൂണിറ്റിനെ തേടിയെത്തിയത്.
