മുംബൈ: ബോളിവുഡിൽ നിന്നും നടിമാർക്ക് ലഭിക്കുന്ന പ്രതിഫലത്തെ കുറിച്ച് പ്രിയങ്ക ചോപ്ര നടത്തിയ പരാമർശത്തിന് മറുപടിയുമായി കങ്കണ റണാവത്ത്. അറുപതിലേറെ സിനിമയിൽ അഭിനയിച്ചിട്ടും പുരുഷ താരങ്ങളുടെ അത്രയും പ്രതിഫലം ലഭിച്ചിട്ടില്ലെന്ന് പ്രിയങ്ക വ്യക്തമാക്കിയിരുന്നു. ഇതിനെ കളിയാക്കിക്കൊണ്ടാണ് കങ്കണയുടെ മറുപടി. ബോളിവുഡിൽ 60 ലേറെ സിനിമ അഭിനയിച്ചിട്ടും അതിലെ ആൺതാരങ്ങളുടെ പത്ത് ശതമാനം പോലും ശമ്പളം ലഭിച്ചില്ലെന്ന് പ്രിയങ്ക പറഞ്ഞത്. ഇതിനെ കളിയാക്കുന്ന രീതിയിലാണ് ഇത് സംബന്ധിച്ച് പ്രിയങ്ക പറയുന്ന റീൽ പങ്കുവച്ച് കങ്കണ പ്രതികരിച്ചത്.
സിനിമകളിൽ റോളുകൾ ലഭിക്കുന്നതിനു പകരമായി പല സഹായങ്ങളും ചെയ്യാൻ ബോളിവുഡിലെ പല മുൻനിര നടിമാരും തയ്യാറാണെന്ന് ആരോപിച്ച് കങ്കണ റണാവത്ത്. തങ്ങളേക്കാൾ മികച്ച നടിമാരിലേക്ക് അവസരം വഴുതിപ്പോകാതിരിക്കാൻ പ്രതിഫലം വാങ്ങാതെ അഭിനയിക്കാൻ തയ്യാറുള്ളവരുമുണ്ടെന്നും കങ്കണ തുറന്നടിച്ചു.
‘എനിക്ക് മുമ്പുള്ള സ്ത്രീകൾ ഈ പുരുഷാധിപത്യ മാനദണ്ഡങ്ങൾക്ക് കീഴടങ്ങി എന്നത് സത്യമാണ്. ശമ്പള തുല്യതയ്ക്കായി ആദ്യമായി പോരാടിയത് ഞാനായിരുന്നു, ഇത് ചെയ്യുമ്പോൾ ഞാൻ നേരിട്ട ഏറ്റവും വെറുപ്പുളവാക്കുന്ന കാര്യം എന്റെ സമകാലികർ ഞാൻ ചെയ്ത അതേ വേഷങ്ങളിൽ സൗജന്യമായി ചെയ്യാം എന്ന് പറഞ്ഞ് വന്നവരാണ്.അതിനായി അവർ ചർച്ചകൾ നടത്തി. എനിക്ക് ആത്മവിശ്വാസത്തോടെ പറയാൻ കഴിയും, മിക്ക എ സ്റ്റാർ നടിമാരും അന്ന് സിനിമകൾ സൗജന്യമായി ചെയ്യുന്നതിനൊപ്പം മറ്റ് ചില ഒത്തുതീർപ്പുകളും നടത്തി കാരണം റോളുകൾ ശരിയായ ആളുകളിലേക്ക് പോകുമെന്ന് അവർ ഭയപ്പെട്ടിരുന്നു.തുടർന്ന് തങ്ങളാണ് ഏറ്റവും കൂടുതൽ പ്രതിഫലം വാങ്ങുന്നതെന്ന ലേഖനങ്ങൾ അവർ എഴുതിപ്പിച്ചു, പുരുഷ അഭിനേതാക്കളെ പോലെ എനിക്ക് മാത്രമേ പ്രതിഫലം ലഭിക്കുന്നുള്ളൂവെന്നും മറ്റാർക്ക് അറിയില്ലെങ്കിലും സിനിമ ലോകത്ത് എല്ലാവർക്കും അറിയാം” എന്നാണ് കങ്കണ ഇൻസ്റ്റഗ്രാം സ്റ്റോറിയായി കുറിച്ചിരിക്കുന്നത്.’
പ്രിയങ്കയ്ക്കെതിരായാണ് കങ്കണ കുറിപ്പിൽ സംസാരിക്കുന്നതെങ്കിലും, ബോളിവുഡിലെ തൊഴിൽ അനുഭവങ്ങളുമായി ബന്ധപ്പെട്ട് പ്രിയങ്ക നേരത്തേ നടത്തിയിരുന്ന വെളിപ്പെടുത്തലുകളെ പിന്തുണച്ചുകൊണ്ടും കങ്കണ രംഗത്തു വന്നിരുന്നു. ബോളിവുഡിൽ ചിലർ തന്നെ ലക്ഷ്യം വച്ച് പ്രവർത്തിക്കുകയും ഒറ്റപ്പെടുത്തുകയും ചെയ്തിരുന്നതായി പ്രിയങ്ക വെളിപ്പെടുത്തിയത് അടുത്തിടെയാണ്. ഇക്കാര്യത്തിൽ പിന്തുണയറിയിച്ചുകൊണ്ട് കങ്കണ ട്വീറ്റ് ചെയ്തിരുന്നു.
