മലപ്പുറം; സ്വർണം വാങ്ങാനെന്ന വ്യാജേന എത്തിയ യുവതി മൂന്ന് പവൻ സ്വർണം മോഷ്ടിച്ചു. ഒന്നരപവന്റെ രണ്ട് സ്വർണമാലകളാണ് യുവതി മോഷ്ടിച്ചത്. മലപ്പുറം ചെമ്മാട് ആണ് സംഭവം. ഇതിന്റെ സിസിടിവി ദൃശ്യങ്ങൾ പുറത്ത് വന്നിട്ടുണ്ട്.
സ്വർണം വാങ്ങാനെന്ന വ്യാജേനയാണ് യുവതി ജ്വല്ലറിയിലെത്തിയത്. നിരവധി മാലകളുടെ മോഡലുകൾ സെയിൽസ്മാൻ ഇവർക്ക് കാണിച്ച് കൊടുത്തു. വീണ്ടും മറ്റ് മോഡലുകൾ എടുക്കാൻ പോയ തക്കത്തിനാണ് യുവതി സ്വർണം കൈക്കലാക്കി പർദയ്ക്കുള്ളിൽ ഒളിപ്പിച്ചത്.
അൽപ്പ സമയത്തിന് ശേഷം മോഡലുകൾ ഇഷ്ടപ്പെട്ടില്ലെന്ന് പറഞ്ഞ് സ്ത്രീ ജ്വല്ലറിയിൽ നിന്ന് മടങ്ങി. യുവതി പോയശേഷം നടത്തിയ പരിശോധനയിലാണ് ഒന്നരപ്പവന്റെ രണ്ടു സ്വർണമാലകൾ കാണാനില്ലെന്നു വ്യക്തമായത്. തുടർന്ന് ജ്വല്ലറിയിലെ സിസിടിവി ദൃശ്യങ്ങൾ പരിശോധിച്ചപ്പോഴാണ് യുവതിയാണു മാല മോഷ്ടിച്ചതെന്ന് വ്യക്തമായത്. ജ്വല്ലറി ഉടമകൾ തിരൂരങ്ങാടി പോലീസിൽ പരാതി നൽകി.
Discussion about this post