തിരുവനന്തപുരം: സംസ്ഥാനത്ത് ഇന്ന് മുതൽ കാലവർഷം ശക്തമാകും. ഇന്നും വരും ദിവസങ്ങളിലും ശക്തമോ അതിശക്തമോ ആയ മഴയ്ക്ക് സാദ്ധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ഇതിന്റെ അടിസ്ഥാനത്തിൽ മഴ മുന്നറിയിപ്പും പുറപ്പെടുവിച്ചിട്ടുണ്ട്.
ഇന്ന് രാവിലെ മുതൽ കേരളത്തിൽ ശക്തമായ മഴ അനുഭവപ്പെട്ടേക്കാം. ഇതിന്റെ അടിസ്ഥാനത്തിൽ ആറ് ജില്ലകളിൽ യെല്ലോ അലർട്ട് ഏർപ്പെടുത്തി. ആലപ്പുഴ, എറണാകുളം, ഇടുക്കി, തൃശ്ശൂർ, മലപ്പുറം, കോഴിക്കോട് എന്നീ ജില്ലകളിലാണ് യെല്ലോ അലർട്ടുള്ളത്. മഴ മുന്നറിയിപ്പ് പുറപ്പെടുവിച്ചിട്ടില്ലെങ്കിലും മറ്റ് ജില്ലകളിലെ ഒറ്റപ്പെട്ടയിടങ്ങളിലും കാര്യമായ മഴ ലഭിക്കും.
നിലവിൽ അറബിക്കടലിൽ സ്ഥിതി ചെയ്യുന്ന ബിപോർജോയ് ചുഴലിക്കാറ്റും, ബംഗാൾ ഉൾക്കടലിൽ രൂപം കൊണ്ട ന്യൂനമർദ്ദവുമാണ് കേരളത്തിലെ കാലവർഷത്തിൽ സ്വാധീനം ചെലുത്തിയിരിക്കുന്നത്. ഇതിന്റെ പശ്ചാത്തലത്തിൽ ഇന്നലെ മുതൽ കാര്യമായ മഴ കേരളത്തിൽ ലഭിക്കുന്നുണ്ട്. മഴയ്‌ക്കൊപ്പം ശക്തമായ കാറ്റും ഇടിമിന്നലും അനുഭവപ്പെടുന്നുണ്ട്. ശക്തമായ കാറ്റിലും ഇടിമിന്നലിലും തിരുവനന്തപുരം പാങ്ങോട് വീടിന് മുകളിലൂടെ മരം വീണ് അപകടം ഉണ്ടായിരുന്നു.
ശക്തമായ കാറ്റിന്റെ സാഹചര്യത്തിൽ മത്സ്യബന്ധനത്തിന് വിലക്കേർപ്പെടുത്തിയിട്ടുണ്ട്. ബുധനാഴ്ചവരെ കേരള-കർണാടക- ലക്ഷദ്വീപ് തീരങ്ങളിൽ മത്സ്യബന്ധനത്തിനായി പോകരുത് എന്നാണ് നിർദ്ദേശം.
Discussion about this post