മൊബൈല് ഫോണുകളില് ഐഫോണിനുള്ള പ്രതാപം തകര്ക്കാന് ഇതുവരെ മറ്റൊരു ഫോണിനും കഴിഞ്ഞിട്ടില്ല. കയ്യിലൊരു ഐഫോണ് ഉണ്ടെങ്കില്, ആളുടെ ലെവല് തന്നെ മാറുമെന്നാണ് വെപ്പ്. അപ്പോള്പ്പിന്നെ അത് ഒരു ഭീമന് ഐഫോണ് ആണെങ്കിലോ, അയാളൊരു സംഭവമായി മാറും തീര്ച്ച. അങ്ങനെ എട്ടടി നീളമുള്ള തന്റെ ഐഫോണിലൂടെ ഒരു സംഭവമായി ഇന്റെര്നെറ്റ് ലോകത്തെ ഞെട്ടിച്ചിരിക്കുകയാണ് യൂട്യൂബറായ മാത്യൂ ബീം.
പൂര്ണ്ണമായും പ്രവര്ത്തനക്ഷമമായ, എട്ടടി നീളമുള്ള ഐഫോണ് ആണ് മാത്യൂ നിര്മ്മിച്ചത്. ആപ്പിളിന്റെ ഏറ്റവും മികച്ച ഐഫോണുകളിലൊന്നായ 14 പ്രോ മാക്സിന്റെ മാതൃകയിലാണ് ഈ എട്ടടി നീളമുള്ള ഫോണ് ഉണ്ടാക്കിയിരിക്കുന്നത്. ഈ ഫോണിന്റെ സവിശേഷതകള് ആളുകള്ക്ക് കാണിച്ചുകൊടുക്കുന്നതിനായി ഒരു ഉന്തുവണ്ടിയില് നിരക്കിയാണ് മാത്യൂ ഈ ഫോണ് ന്യൂയോര്ക്ക് സിറ്റിയിലെ നിരത്തുകളിലൂടെ കൊണ്ടുപോയത്. ടിവി നിര്മ്മിക്കുന്നതിന് ഉപയോഗിക്കുന്ന ടച്ചിംഗ് സാധ്യമാക്കുന്ന സ്ക്രീനാണ് ഉപകരണത്തിന്റെ ഡിസ്പ്ലേയ്ക്കായി ഉപയോഗിച്ചിരിക്കുന്നത്. ഇതൊരു മാക് മിനിയുമായി കണക്റ്റ് ചെയ്താണ് ഉപകരണം പ്രവര്ത്തിക്കുന്നത്. ഫോണുകളിലേത് പോലെ ശബ്ദം കൂട്ടുന്നതിനും കുറയ്ക്കുന്നതിനുമുള്ള ബട്ടണുകളും ഈ ഭീമന് ഫോണിലുണ്ട്.
തന്റെ യൂട്യൂബ് ചാനലില് ഈ ഫോണ് നിര്മ്മിക്കുന്ന പ്രക്രിയ മുഴുവന് വീഡിയോ ആയി മാത്യൂ പങ്കുവെച്ചിട്ടുണ്ട്.
മാക് മിനിയുമായി കണക്റ്റ്് ചെയ്തിരിക്കുന്നതിനാല് ഐഫോണില് ലഭിക്കുന്ന എല്ലാ ആപ്ലിക്കേഷനുകളും ഈ ഉപകരണത്തില് ലഭ്യമാണ്. ഫ്രണ്ട് ക്യാമറ ഉള്പ്പടെ രണ്ട് ക്യാമറകളും ഈ ഭീമന് ഐഫോണിലുണ്ട്. പക്ഷേ ഇതില് സെല്ഫി എടുക്കുക അല്പ്പം ബുദ്ധിമുട്ടാണ്. ക്യാമറ ബട്ടണ് ഓണ് ചെയ്ത് ഒന്ന് ഉയര്ന്ന് ചാടിയാല് പോലും ഫ്രെയിമില് വരാന് പാടാണ്. എന്തായാലും മാത്യുവിന്റെ ഈ വലിയ അധ്വാനം വെറുതെ ആയില്ല. 2020ല്, ZHC എന്ന യുട്യൂബര് നിര്മ്മിച്ച ആറടി നീളമുള്ള ഐഫോണിന്റെ റെക്കോഡാണ് മാത്യുവിന്റെ എട്ടടി നീളമുള്ള ഐഫോണ് തകര്ത്തത്.
Discussion about this post