തന്റെ കോടിക്കണക്കിന് വരുന്ന ആസ്തി ഒരിക്കലും മകന് കൈമാറില്ലെന്ന് വെളിപ്പെടുത്തി ആക്ഷൻ ഇതിഹാസ താരം ജാക്കി ചാൻ. വർഷങ്ങളായി മക്കൾ രണ്ട് പേരും പിതാവിനെതിരെ ഗുരുതര വെളിപ്പെടുത്തലുകളാണ് നടത്തിയിട്ടുള്ളത്. ഇതിന് പിന്നാലെയാണ് തന്റെ മകൻ ജെയ്സി ചാനെ ഒരിക്കലും തന്റെ സ്വത്തിന്റെ അവകാശി ആക്കില്ല എന്ന് ജാക്കി ചാൻ പറഞ്ഞത്.
മകൻ ജെയ്സി ചാൻ എങ്ങനെ മാറിയെന്നതിനെക്കുറിച്ചും അതിൽ താൻ അതൃപ്തനാണെന്നും താരം വെളിപ്പെടുത്തി. മാന്യമായ സംഭാഷണം എങ്ങനെ നടത്തണമെന്ന് പോലും ജെയ്സി ചാന് അറിയില്ല. അച്ചടക്കമില്ലാതെയാണ് അയാൾ ജീവിക്കുന്നത്. താൻ മരിക്കുമ്പോൾ, തന്റെ മകന് അനന്തരാവകാശിയാകാൻ ഭാഗ്യം ലഭിക്കില്ലെന്നും അദ്ദേഹം വ്യക്തമാക്കി.
മകന് കൊടുക്കുന്നതിന് പകരം ആ പണം കൊണ്ട് താൻ ജീവകാരുണ്യപ്രവർത്തനങ്ങൾ ചെയ്യും. ”അവന് കഴിവുണ്ടെങ്കിൽ അവൻ പണം ഉണ്ടാക്കും, ഇല്ലെങ്കിൽ അവൻ എന്റെ പൈസ വെറുതെ കളയും” ജാക്കി ചാൻ പറഞ്ഞു.
നടനും ഗായകനുമാണ് ജെയ്സി ചാൻ. ജാക്കി ചാന് എറ്റ എൻ ജി ചോക് ലാം എന്ന മകളുമുണ്ട്. 1999ൽ എലെയ്ൻ ങ് യി-ലീയുമായുള്ള നടന്റെ വിവാഹേതര ബന്ധത്തിലുണ്ടായ മകളാണിത്. അതുകൊണ്ട് തന്നെ ഇയാൾക്ക് മകളുമായി ഒരു ബന്ധവുമില്ല.
Discussion about this post