ന്യൂഡൽഹി : മണിപ്പൂരിലെ അക്രമ സംഭവങ്ങളിൽ വിശദമായ ചർച്ച വേണമെന്ന ആവശ്യവുമായി പ്രതിപക്ഷം രാഷ്ട്രപതി ദ്രൗപതി മുർമ്മുവിന്റെ സമയം തേടി. രാജ്യസഭ പ്രതിപക്ഷ നേതാവും കോൺഗ്രസ് അദ്ധ്യക്ഷനുമായ മല്ലികാർജുൻ ഖാർഗെയുടെ നേതൃത്വത്തിലുള്ള സംഘമാണ് രാഷ്ട്രപതിയെ കാണാൻ സമയം തേടിയത്. ബി ജെ പി ഭരണത്തിലുള്ള വടക്ക് കിഴക്കൻ സംസ്ഥാനങ്ങളിൽ ആക്രമണങ്ങൾ തുടർക്കഥയാവുകയാണെന്നും ഇതിനോടകം നിരവധി പേർക്ക് ജീവഹാനി സംഭവിച്ചെന്നും ചൂണ്ടിക്കാണിച്ചാണ് മണിപ്പൂരിൽ രാഷ്ട്രപതിയുടെ ഇടപെടൽ ആവശ്യപ്പെടുന്നത്.
എന്നാൽ ഇതുവരെയും രാഷ്ടപതിയെ കാണാനുള്ള സമയം അനുവദിച്ച് കിട്ടിയിട്ടില്ലെന്നും ഖാർഗെ അറിയിച്ചു. ഐ എൻ ഡി ഐ എ സഖ്യത്തിന്റെ 21 എംപിമാരുടെ പ്രതിനിധി സംഘം സംഘർഷ ബാധിത പ്രദേശങ്ങൾ സന്ദർശിക്കുകയും സ്ഥിതിഗതികൾ വീക്ഷിച്ച് സഖ്യ നേതാക്കളെ അറിയിക്കുകയും ചെയ്തിട്ടുണ്ടെന്നും ഖാർഗെ കൂട്ടിച്ചേർത്തു.
അതേസമയം പാർലമെന്റിൽ മണിപ്പൂർ കലാപത്തെക്കുറിച്ച് ചർച്ചക്ക് തയ്യാറാണെന്ന് കേന്ദ്ര സർക്കാർ പലതവണ അറിയിച്ചിട്ടും ഇരുസഭകളിലും പ്രധാനമന്ത്രി പ്രസ്താവന ഇറക്കണമെന്ന് ആവശ്യപ്പെട്ടു കൊണ്ട് പ്രതിപക്ഷം സഭ നടപടികൾ തുടർച്ചയായി സ്തംഭിപ്പിക്കുകയാണ്.
Discussion about this post