കൊച്ചി: പുതിയ ചിത്രം പ്രഖ്യാപിച്ച് സംവിധായകൻ വിനയൻ. 18 വർഷം മുൻപ് പുറത്തിറങ്ങി പ്രേക്ഷകമനസ് കീഴടക്കിയ അത്ഭുത ദ്വീപ് എന്ന ചിത്രത്തിന്റെ രണ്ടാം ഭാഗമാണ് അടുത്ത സിനിമയെന്നാണ് സംവിധായകൻ നൽകുന്ന സിനിമ.
പൃഥ്വിരാജും ഗിന്നസ് പക്രുവും നായകന്മാരായ ചിത്രത്തിന്റെ രണ്ടാം ഭാഗത്തിൽ ഉണ്ണി മുകുന്ദനാണ് പക്രുവിനൊപ്പം നായകനായി എത്തുന്നത്. മാളികപ്പുറം തിരക്കഥാകൃത്ത് അഭിലാഷ് പിള്ളയും ചിത്രത്തിന്റെ ഭാഗമാകുന്നുണ്ട്. 2024 ലാണ് ചിത്രം തിയേറ്ററുകളിലെത്തുക. ചിത്രത്തിന്റെ അണിയറ പ്രവര്‍ത്തകരെയും മറ്റ് അഭിനേതാക്കളെയും കുറിച്ചുള്ള വിവരങ്ങള്‍ ഉടന്‍ പുറത്തുവരും.
“18 വര്‍ഷങ്ങള്‍ക്ക് ശേഷം അത്ഭുതദ്വീപിലെ കാഴ്ച്ചകള്‍ കാണാന്‍ വീണ്ടുമൊരു യാത്ര തുടങ്ങുന്നു. ഇത്തവണ പക്രുവിനൊപ്പം ഉണ്ണി മുകുന്ദനും അഭിലാഷ് പിള്ളയുമുണ്ട് കൂട്ടിന്. സിജു വില്‍സണുമായുള്ള ചിത്രത്തിന് ശേഷം 2024ല്‍ ഞങ്ങള്‍ അത്ഭുതദ്വീപിലെത്തും”, എന്നാണ് വിനയൻ കുറിച്ചത്.
കഴിഞ്ഞ വർഷം ചിത്രത്തിന് രണ്ടാം ഭാഗം ഉണ്ടാകുമെന്ന് ഗിന്നസ് പക്രുവും സൂചന നൽകിയിരുന്നു.അത്ഭുത ദ്വീപ് 2′ ഉണ്ടാകും എന്ന ശുഭ സൂചന വിനയൻ സർ നൽകി കഴിഞ്ഞു. എല്ലാം ഒത്തു വന്നാൽ അത് സംഭവിക്കുമെന്നായിരുന്നു നടന്റെ വാക്കുകൾ.
‘അത്ഭുതദ്വീപി’ന്റെ രണ്ടാം വരവിന്‍റെ സന്തോഷം ഗിന്നസ് പക്രുവും പങ്കുവച്ചു. “അങ്ങനെ 18 വർഷങ്ങൾക്കു ശേഷം ഞാനും അത്ഭുത ദ്വീപിനെ സ്നേഹിക്കുന്ന നിങ്ങളും കാത്തിരുന്ന ആ പ്രഖ്യാപനം വിനയൻ സറിൽ നിന്നും വന്നെത്തിയിരിക്കുന്നു… ഒരുപാടു സന്തോഷവും അതിലേറെ ആവേശവും..കാരണം രണ്ടാം ഭാഗത്തിൽ ഞങ്ങൾക്കൊപ്പം പ്രിയപ്പെട്ട ഉണ്ണിയും, അഭിലാഷ് പിള്ളയും ഉണ്ട്..അത്ഭുത ദ്വീപിലെ പുതിയ വിസ്മയ കാഴ്ചകൾക്കായി നമുക്ക് കാത്തിരിക്കാം”, എന്നാണ് അദ്ദേഹം കുറിച്ചത്.
Discussion about this post