ബ്രഹ്‌മപുരത്തെ മാലിന്യസംസ്‌കരണത്തിന് കറുത്ത പടയാളി ഈച്ചകളെ ഉപയോഗിക്കാൻ ഒരുങ്ങുന്നതായി അടുത്തിടെയാണ് വാർത്തകൾ പുറത്തുവന്നത്. ഇത് കേട്ടപ്പോഴെ പടയാൡഈച്ചകൾ അത്ര നിസ്സാരക്കാരല്ലെന്ന് മലയാളികൾക്ക് മനസിലായിട്ടുണ്ടാവും. ബി.പി.സി.എല്ലിന്റെ പുതിയ പ്ലാന്റ് നിർമിക്കുന്നതുവരെ മാലിന്യ സംസ്‌കരണത്തിനുള്ള താത്കാലികസംവിധാനമെന്ന നിലയിലാണ് ഈച്ചയെ പ്രയോഗിക്കാൻ ആലോചിക്കുന്നതത്രേ. കറുത്ത പടയാളി ഈച്ച (ഹെർമേഷ്യ ഇല്യൂസെൻസ്) യുടെ മുട്ടകൾ നിക്ഷേപിച്ച്, വിരിയിച്ച്, ലാർവകളാക്കി മാറ്റും. മാലിന്യം തിന്ന് ലാർവകൾ പുറത്തുവിടുന്ന വിസർജ്യം 15 ദിവസത്തിനുള്ളിൽ കമ്പോസ്റ്റ് വളമായി മാറ്റാനാകുമെന്നാണ് കണക്കുകൂട്ടൽ.
എന്നാൽ ഈ ഈച്ചകളെ ഉപയോഗിച്ച് പ്ലാസ്റ്റിക് നിർമ്മിക്കാമെന്ന് അറിഞ്ഞാലോ ? വെറും പ്ലാസ്റ്റിക് അല്ല, നല്ല അസ്സൽ ബയോഡീഗ്രോഡബിൾ പ്ലാസ്റ്റിക്. ടെക്‌സാസിലെ ഗവേഷകരാണ് ഈ നിർണ്ണായക കണ്ടെത്തലുമായി രംഗത്തെത്തിയത്. ഉടൻ തന്നെ ഇത് പ്രാവർത്തികമാക്കാമെന്നാണ് പ്രതീക്ഷ.
കഴിഞ്ഞ രണ്ട് ദശാബ്ദമായി ബ്ലാക്ക് സോൾജിയേഴ്‌സ് ഫ്‌ളൈ എന്ന പടയാളി ഈച്ചകളെ എങ്ങനെ എല്ലാം ഉപയോഗിക്കാമെന്ന് ഗവേഷണം നടത്തുകയായിരുന്നു സംഘം.ടെക്‌സാസ് എ ആന്‍ഡ് എം സര്‍വകലാശാലയിലെ ക്യാരന്‍ വൂളിയായിരുന്നു മുഖ്യഗവേഷകന്‍. സാധാരണയായി പടയാളി ഈച്ചകളുടെ ലാർവകളും പുഴുക്കളുമാണ് ഉപയോഗിക്കുന്നത്. പ്രായപൂർത്തിയായ ഈച്ചകളെ കൊണ്ട് പ്രത്യേകിച്ച് ഉപകാരമുള്ളതായി കണ്ടെത്തിയിരുന്നില്ല. പടയാൡഈച്ചകളുടെ ലാർവകളിൽ പ്രോട്ടീൻ പോലുള്ള ഘടകങ്ങൾ ഉണ്ടെന്ന് മുൻ കാലങ്ങളിലേ കണ്ടുപിടിക്കുകയും വ്യാവസായിക അടിസ്ഥാനത്തിൽ അത് കൃഷിചെയ്ത് ഉണ്ടാക്കി മൂല്യവർദ്ധിത ഉത്പ്പന്നങ്ങളാക്കി വിപണിയിലെത്തിക്കുകയും ചെയ്യാറുണ്ട്. എന്നാൽ ഈ പടയാളി ഈച്ചകളെ കൊണ്ട് എന്താണ് പ്രയോജനം?
ഗവേഷണത്തിന്റെ അന്തിമഘട്ടത്തിൽ് പടയാളി ഈച്ചകളിലെ ഒരു പ്രധാന ഘടകമാണ് കൈറ്റിനെന്ന് (chitin) ഗവേഷകർ തിരിച്ചറിഞ്ഞു. പടയാളി ഈച്ചകൾക്ക് പുറംതോടിന് ബലം നൽകുന്നത് ഈ ഘടകമാണ്. ചെമ്മീൻ, ഞണ്ട് പോലുള്ള സമുദ്ര ജീവികളിൽ നിന്ന് കൈറ്റിൻ വേർതിരിച്ചെടുക്കുന്നുണ്ട്. എന്നാൽ ഇവയിൽ നിന്നും കുറച്ചുകൂടി ശുദ്ധമായ കൈറ്റിനാണ് പടയാളി ഈച്ചകളിൽ നിന്ന് വേർതിരിക്കാൻ ഗവേഷകർക്ക് സാധിച്ചത്. ഈ ഉത്പ്പന്നങ്ങളിൽ നിന്ന് അതിന്റെ ഭാരത്തിന്റെ 47 മടങ്ങ് ജലാംശം സൂക്ഷിക്കാൻ കഴിയുന്ന ഹൈഡ്രോജെൽ ഗവേഷകർ വികസിപ്പിച്ച് എടുക്കുകയുണ്ടായി. കൃഷിയിടങ്ങളിൽ ഈ ഹൈഡ്രോജെൽ ഉപയോഗിക്കുന്നതിലൂടെ പ്രളയകാലത്ത് അധികജലം ശേഖരിച്ചുവെക്കാൻ സാധിക്കും. പിന്നീട് വരൾച്ചാകാലത്ത് ഈ ജെല്ലിലൂടെ മണ്ണിൽ ഈർപ്പം നിലനിർത്താനാകും. അധികം വൈകാതെ പോളികാർബണേറ്റ് പോലുള്ള ബയോപ്ലാസ്റ്റിക്കുകൾ ഉടൻ നിർമിക്കാൻ കഴിയുമെന്ന പ്രതീക്ഷയിലാണ് ഗവേഷകർ.
