കണ്ണൂർ: ഗണേശോത്സവം സംഘടിപ്പിക്കുന്നതിൽ വിറളി പൂണ്ട് സിപിഎം. കണ്ണൂർ കീച്ചേരി പാപ്പിനിശ്ശേരിയിൽ രാജേഷ് എന്നയാളുടെ വാഹനത്തിന് മേൽ റീത്ത് വെച്ചാണ് സിപിഎം പ്രവർത്തകർ ഭീഷണി മുഴക്കിയിരിക്കുന്നത്.
ആദരാഞ്ജലികൾ നിന്റെ സമയം എന്ന് എഴുതിയ റീത്താണ് വാഹനത്തിന്റെ ഗ്ലാസിന് മുകളിലായി
വെച്ചത്. ഇന്നലെ രാത്രിയിലായിരുന്നു റീത്ത് വെച്ചത്. രാവിലെയാണ് സംഭവം വീട്ടുകാർ കണ്ടത്.
ബൈക്കിലെത്തിയവരാണ് റീത്ത് വെച്ചതെന്ന് വ്യക്തമായിട്ടുണ്ട്. പ്രദേശത്തെ സിസിടിവി ക്യാമറകളിൽ നിന്നാണ് ഇക്കാര്യം വ്യക്തമായത്. സംഭവത്തിൽ വളപട്ടണം പോലീസ് സ്‌റ്റേഷനിൽ പരാതി നൽകിയിട്ടുണ്ട്.
ഗണേശ ഉത്സവവുമായി ബന്ധപ്പെട്ട് സജീവമായി പ്രവർത്തിച്ചതിന്റെ പേരിലാണ് സിപിഎം പ്രവർത്തകരുടെ പ്രകോപനം. ബിജെപി അനുഭാവി എന്നതിനപ്പുറത്തേക്ക് സജീവ പ്രവർത്തകൻ അല്ലെന്ന് രാജേഷ് പറഞ്ഞു. ഹൈന്ദവ വിശ്വാസി എന്ന നിലയിൽ ഗണേശോത്സവത്തിന്റെ പിരിവിന് ഇറങ്ങിയിരുന്നു. ഇതാകാം സിപിഎം പ്രവർത്തകർക്ക് പ്രകോപനമായത്. സംഭവത്തിൽ പ്രതിഷേധമുയർന്നു കഴിഞ്ഞു.
കീച്ചേരിയിൽ വലിയ ജനപങ്കാളിത്തത്തോടെയാണ് ഗണേശോത്സവം നടന്നുവരുന്നത്.
ഞായറാഴ്ച വൈകിട്ടാണ് ഗണേശ വിഗ്രഹ നിമജ്ഞനം ഉൾപ്പെടെ നടക്കുക. ഇതിന് മുൻപുണ്ടായ സംഭവം പ്രദേശത്തെ സമാധാന അന്തരീക്ഷം തകർക്കാൻ ലക്ഷ്യമിട്ടാണെന്ന് പരാതി ഉയർന്നിട്ടുണ്ട്.
ഗണപതി മിത്താണെന്ന് പറഞ്ഞതിന്റെ പേരിൽ തലശേരിയിൽ നിന്നുളള നിയമസഭാംഗവും സ്പീക്കറുമായ എ.എൻ ഷംസീറിനെതിരെയും സിപിഎം നേതാക്കൾക്കെതിരെയും വിശ്വാസികളുടെ പ്രതിഷേധം നിലനിൽക്കെയാണ് സംഭവം.
